Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Ақмола облысында саяси қуғын-сүргін құрбандарын еске алу шарасы өтті

2021 жылдың 27 мамыр 2021 18:47

КӨКШЕТАУ. ҚазАқпарат - Бүгін Көкшетауда саяси қуғын-сүргін және ашаршылық құрбандарын еске алу күніне арналған «Тарихтан тағылым-өткенге тағзым» атты дөңгелек үстел өтті, деп хабарлайды ҚазАқпарат тілшісі Ақмола облыстық ішкі саясат басқармасына сілтеме жасап.

Ведомствоның мәліметінше, шараға облыс әкімінің орынбасары Айна Мысырәлімова, жергілікті ғылыми және шығармашылық зиялы қауым, этномәдени және үкіметтік емес бірлестіктер өкілдері қатысты. Кездесуде Айна Мысырәлімова тарихымыздың қаралып отырған кезеңі - қазақ даласының зиялыларының жойылуына әкелген, ұлттың түсін жойған, жүздеген мың адамның өмірін қиған және халықтың генофондына орны толмас зиян келтірген ең қайғылы кезең екенін ерекше атап өтті.

«Сталиндік қуғын-сүргін бұл біздің тарихымызда енді қайталанбауы тиіс. Бүгін біз ашаршылық құрбандарын еске сала отырып, сол қорқынышты күндер туралы жаңа деректерді тауып, жария ете отырып, жазықсыз қаза тапқандардың есімдерін қалпына келтіруіміз керек. Өткен жылы Мемлекет басшысы «саяси қуғын-сүргін құрбандарын толық ақтау жөніндегі мемлекеттік комиссия туралы» Жарлыққа қол қойды. Осы жылдың басында Саяси қуғын-сүргін құрбандарын ақтау жөніндегі Ақмола комиссиясы құрылды. Біздің өңірде саяси қуғын-сүргін құрбандарын толық оңалту бойынша бірқатар жұмыстар басталды», - деп атап өтті Айна Мысырәлімова.

Осы қиын кезең туралы Ш.Уәлиханов атындағы Көкшетау университеті ректорының кеңесшісі Аманай Сейтқасымов өз ойымен бөлісті. Саяси қуғын-сүргін құрбандарына қатысты тарихи әділеттілікті қалпына келтіру ісіндегі басты миссия - бұл жастарды ерлік сабақтарында және отандастарымыздың патриотизмі үлгілерінде тәрбиелеу. Мұндай пікірді Ақмола облысының тумалары, «Алаш» партиясының қайраткерлері – «Алаш арысы Біләл Малдыбайұлы» және «Хайретдин Болғанбаев – өшпес жұлдыздың жарығы» туралы кітаптарды таныстырған саясаттанушы Достық Кәмелов пен Ш.Уәлиханов атындағы Көкшетау университетінің студенті Ерден Нұрахмет те білдірді.

Саяси қуғын-сүргін құрбандарын толық ақтау мәселесі кең ауқымды міндеттерді қамтиды. Мұнда этностарды туған жерлерінен күштеп көшіру мәселелері ерекше орын алады. Депортацияланған халықтардың бастан кешкен қиыншылықтары туралы ҚР Президенті жанындағы Мемлекеттік басқару академиясының Ақмола облысы бойынша филиалының директоры Белла Газдиева айтып берді.

Дөңгелек үстел отырысы пікір алмасумен жалғасты, қатысушылар ел тарихындағы саяси қуғын-сүргін мен ашаршылық туралы өз ойларымен бөлісті.

Соңында отырыстың қорытындысы шығарылып, осы бағытта болашаққа жоспарланған іс-шаралар, оның ішінде саяси қуғын-сүргін құрбандарын ақтау туралы өңірлік комиссияның жұмысы талқыланып, белгіленді.





Жоғары қарай