Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Алматыда қалаға жаңадан қосылған аудандарда жол жөнделіп жатыр

2021 жылдың 22 мамыр 2021 19:29

АЛМАТЫ. ҚазАқпарат -Алматы әкімі Бақытжан Сағынтаев Медеу мен Түрксіб аудандарына қосылған ықшамаудандардағы инженерлік және жол-көлік инфрақұрылымын дамыту мәселелері жөнінде көшпелі кеңес өткізді, деп хабарлайды ҚазАқпарат тілшісі.

Бұл туралы әкім Instagram-парақшасында хабарлады.

«Думан» ықшамауданында ұзындығы 27,4 шақырым болатын 53 көшеге асфальт төсеу үшін негіз дайындалуда. Ең күрделі учаскелерге мән беріп, жұмысшы мен техниканың санын көбейтуді тапсырдым», - деп жазды Алматы әкімі.

2020 жылы «Думан» ықшамауданының Хан тәңірі, Қазығұрт, Қарқаралы, Ақмешіт, Бурабай, Болашақ көшелерінде жалпы ұзындығы 3,1шақырым тротуар мен арық желілері салынды, жол төсеміне күрделі жөндеу жүргізілді. Қоғамдық көліктің қауіпсіз қозғалысын қамтамасыз ету үшін терминалдың бұрылу аймақтары абаттандырылды.

«Нұршашқан» ықшамауданында 7 көшеге ірі асфальтбетон төселіп, 18 көшеде негіз дайындалып, 8 көшеге тротуар салынды. Әлмеректегі 9 көшеде, Қайраттағы 7 көшеде негіз дайындалды. «Өжет» ықшамауданында да жұмыстар жалғасуда. Екі көшеге ірі асфальтбетон төселіп, 6 көшеде негіз дайындалды.

«Барлық учаскелерде жұмысты жандандыру керек. Заңбұзушылықтар орын алса, мердігерлер жауапкершілікке тартылады. Қала тұрғындары баяу жүргізілген жұмыс пен жауапсыз жұмысшылардан зардап шекпеуі тиіс», - деп атап өтті қала әкімі.

Сондай-ақ, талшықты-оптикалық желі бойынша жоғары жылдамдықты интернеттің қолжетімділігі мәселесі шешілуде. Жоба пилоттық режимде Түрксібтегі «Нұршашқан» ықшамауданы мен Наурызбай ауданына қарасты «Тастыбұлақ» ықшамауданында қосылды. Қосылуға 8 мыңнан астам өтінім жиналды. Қызмет ақысын бөліп төлеуге болады. Әлеуметтік жағынын аз қамтылған азаматтарға жеңілдетілген пакеттер де бар.


Автор Алма Мұқанова
Басты сөздер: Алматы, Қоғам,
Жоғары қарай