Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Алматыда кәсіпкерден 14 млн теңге пара алған мәйітхананың экс-директоры сотталды

2021 жылдың 17 маусым 2021 19:21

АЛМАТЫ. ҚазАқпарат - Алматыда қалалық патологоанатомия бюросының бұрынғы директоры Бақытжан Әлібеков сегіз жылға сотталды, деп хабарлайды ҚазАқпарат тілшісі.

Бүгін Алматы қаласы Медеу ауданының №2 сотында қалалық патологоанатомиялық бюроның бұрынғы директоры Бақытжан Әлібековке қатысты үкім шықты.

Ол кәсіпкерден 14 миллион теңге көлемінде пара алды деп айыпталды.

«Әлібеков Қазақстан Республикасы Қылмыстық кодексінің төрт бабы бойынша - 24-баптың 3-бөлігі, 366-баптың 3-бөлігі 3-тармағы, 189-баптың 3-бөлігі 1, 2-тармақтары, 364-баптың 1-бөлігі бойынша кінәлі деп танылды. Ол 8 жылға бас бостандығынан айырылды. Жазасын орташа қауіпсіздік деңгейіндегі мекемеде өтейді»,- деп хабарлады Алматы қаласы Медеу ауданы №2 сотынын баспасөз қызметі.

Ол сондай-ақ бұдан былай мемлекеттік қызметте, сотта, жергілікті өзін-өзі басқару органдарында, ұлттық банкте және қаржы нарығын қадағалау органдарында қызмет ете алмайды.

«Әлібековтің кәмелетке толмаған баласы бар екені сондай-ақ бұл оның алғаш жасаған қылмысы екені әрі қылмысты ауырлататын мән-жайлар жоқтығы ескерілді», - деп хабарлады соттан.

Сот үкімі заңды күшіне енген жоқ.

Еске сала кетсек, мәйітхананың бұрынғы директоры Бақытжан Әлібековты өткен жылдың қазан айында Алматы қалалық прокуратурасы сыбайлас жемқорлыққа қарсы қызметпен бірлесе ұстады.


Жоғары қарай