Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Алматыда ҰБТ-ның алғашқы аптасында 9 түлектің нәтижесі жойылды

2022 жылдың 24 мамыр 2022 17:19

АЛМАТЫ. ҚазАқпарат – Алматыда Ұлттық бірыңғай тестілеу басталған алғашқы аптада ереже бұзудың 9 фактісі анықталып, тест нәтижелері жойылды. Бұл туралы брифинг барысында қалалық Білім сапасын қамтамасыз ету департаментінің басшысы Гүлнәр Ермекбаева мәлім етті, деп хабарлайды ҚазАқпарат тілшісі.

«Алматыда ҰБТ басталғалы бір апта ішінде 1300-ге жуық түлек тест тапсырды. Мегаполистегі үш тестілеу орталығында ереже бұзудың 9 жағдайы анықталды. Олардың біреуі тест тапсырмаларын шығарып, таратпақшы болған. Қалғандары телефон арқылы қашықтан жауап алуға тырысты. Бәрінің нәтижесі жойылды. Сонымен қатар олар енді екінші мүмкіндігін қолдана алмайды», - деді ол.

Спикердің айтуынша, түлек бірінші тестілеуден сәтті өтіп, екінші мүмкіндікте белгілі бір ережелерді бұзса, онда екі тестілеудің де нәтижелері жойылады және ол грант алу конкурсына қатыса алмайды.

«Сондықтан әрбір талапкерді академиялық адалдықты сақтауға шақырамыз. Әрбір ата-ана ҰБТ-ның өту барысын көре алады. Барлық бейнежазба тестілеуден кейін тексерістен өтеді. Тестілеуге қатысушы тәртіп бұзған жағдайда нәтижесі жойылады, грант иегері болып жатса да, грантынан айырылады», – деді Гүлнәр Ермекбаева.


Жоғары қарай