Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

ۇلاربەك نۇرعالىم ۇلى. پاتشانىڭ ءراسىمى

2021 жылдың 1 желтоқсан 2021 14:16

نۇر-سۇلتان.قازاقپارات -تاۋەلسىزدىك جەر بەتىندەگى كۇللى قازاق ءۇشىن قانداي قاستەرلى بولسا، ەگەمەن ەلدىڭ تىزگىنىن ەڭ العاش قولعا العان تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆ تا سونداي قۇرمەتكە يە بولدى.

اسىرەسە، شەتتەگى قازاق «نازارباي» دەپ ەرەكشە ارداقتاپ اتايتىن ەلباسى ەسىمى ولاردىڭ كوڭىل تورىنەن مىزعىماستاي ورىن الدى. اقىن، جازۋشى ۇلاربەك نۇرعالىم ۇلىنىڭ ارعى بەتتەگى اعايىننىڭ ءومىرى ورنەكتەلگەن «داياعاششى» كىتابىندا ەلباسىنىڭ سۋرەتىن ەڭ العاش كورگەن الىستاعى اۋىل ادامدارىنىڭ ەرەكشە ءىلتيپاتى ايتىلادى. سول «پاتشانىڭ ءراسىمى» اتتى شاعىن اڭگىمەنى ۇسىنامىز.

تاۋەلسىزدىكتىڭ العاشقى ايلارى بولاتىن. جاسىمىز ونعا تولماعان بالامىز. شىنجاڭ ولكەسىندە، الىس ەلدىمەكەندە تۇرامىز.

ءبىر كۇنى داستارحان جاسالىپ، كوپ ادام جينالدى. ءبارى كوڭىلدى، ارقا- جارقا. ابدەن كوز بايلانعان ۋاقىتتا اۋىلداعى ساۋداگەر ايقىن كىرىپ كەلدى. قولىندا شيىرشىقتاپ وراعان قاعازى بار. ءتور الدىنا بارىپ جايعاستى. «ال، ەندى اش» دەدى ۇلكەندەر ەنتەلەپ. ايقىن ىڭىرانىپ: «كورەم دەگەندەرىڭ كورىمدىك تاستاڭدار!» دەپ قويادى. كورىمدىك الدى ما، المادى ما، ەسىمدە جوق، الگى وراۋلى قاعازدى اشتى. ماڭدايى جارقىراعان سوم دەنەلى كىسى تۇر. جاپىرلاي قاراپ، تامسانىپ جاتىر. اكەمنىڭ «پاتشا دەسە، پاتشا ەكەن عوي» دەگەنى ەسىمدە. ءبارى جاعالاي ءوز قولدارىنا ۇستاپ انىقتاپ كورىپ جاتتى. ءبىر كەزدە مادەن اقساقال: «ە، قازاقتان شىققان پاتشا وسى بولدى دە، ماڭدايى كەرە قارىس بوپ تۇرۋىن- اي، قازاقتىڭ باعى جانعان ەكەن» دەپ قالتاسىنان شىتىن الىپ كوزىن ءسۇرتتى.. .

مىنە، ءبىزدىڭ اۋىل قازاقستاننىڭ پرەزيدەنتى نۇرسۇلتان نازاربايەۆتىڭ سۋرەتىن ءبىرىنشى رەت وسىلاي كورىپ ەدى. ساۋداگەر ايقىن بۇكىل ەلدى ارالاپ كورسەتىپ شىقتى. سول سۋرەتتىڭ ىستىق- سۋىعى باسىلعانشا اۋىل ادامدارى ءبىر- بىرىنە «پاتشانىڭ ءراسىمىن كورە الدىڭدار ما؟» دەپ شۇناڭ قاعىپ قاۋقىلداسىپ جاتاتىن…

*

ءراسىم - سۋرەت (ۇيعىر تىلىندە)


Басты сөздер: قوعام,
Жоғары қарай