Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

مايمىل شەشەگىنە قارسى ۆاكسينا جاساۋعا الەۋەتىمىز جەتەدى - كۇنسۇلۋ زاكاريا

2022 жылдың 27 мамыр 2022 17:22

نۇر- سۇلتان. قازاقپارات - بيولوگيالىق قاۋىپسىزدىك ماسەلەلەرى جونىندەگى عىلىمي- زەرتتەۋ ينستيتۋتىنىڭ باس ديرەكتورى مايمىل شەشەگىنە قارسى ۆاكسينا ازىرلەۋگە دايىن ەكەندەرىن ايتتى، دەپ حابارلايدى قازاقپارات ءتىلشىسى.

كۇنسۇلۋ زاكاريانىڭ ايتۋىنا قاراعاندا، بيولوگيالىق قاۋىپسىزدىك ماسەلەلەرى جونىندەگى عىلىمي- زەرتتەۋ ينستيتۋتى Poxviridae ۆيرۋستار توبىن تالاي جىلدان بەرى زەرتتەپ كەلەدى. ونىڭ ىشىندە Capripoxvirus تارماعى دا بار. بۇل تارماققا قوي مەن ەشكى شەشەگى، تەرىدەگى ءتۇيىندى بورتپە كىرەدى. سونداي- اق تاۋىق، كوگەرشىن، سيىر، تۇيە جانە مايمىل شەشەگى كىرەتىن Avipoxvirus تارماعى دا اتالمىش ينستيتۋتتىڭ ۇنەمى نازارىندا بولعانعا ۇقسايدى.

«زەرتتەۋ جۇمىستارىنىڭ ناتيجەسىندە قوي شەشەگىنە، ەشكى شەشەگىنە، تەرىنىڭ ءتۇيىندى بورتپەسىنە، تۇيە شەشەگىنە، تاۋىق شەشەگىنە قارسى ۆاكسينالار ازىرلەندى. ولار قازاقستاننان بولەك پوستكەڭەس ەلدەرى ۆەتەريناريا سالاسىندا كەڭىنەن قولدانىلىپ ءجۇر. ينستيتۋت ءوزىنىڭ 63 جىلدىق تاريحىندا اسا قاۋىپتى ينفەكسيالىق اۋرۋلاردىڭ رەسپۋبليكالىق دەپوزيتاريىن قالىپتاستىرعان. ول قوردا ءتۇرلى جانۋارلاردىڭ شەشەك سىنامالارى دا ساقتالعان»، - دەدى عالىم قازاقپارات تىلشىسىنە بەرگەن سۇحباتىندا.

ينستيتۋتتىڭ باس ديرەكتورى قازىر ەلدىڭ نازارى اۋىپ تۇرعان مايمىل شەشەگىنە قارسى ۆاكسينا جاساۋ مۇمكىندىكتەرىنە توقتالدى.

«شەشەك ۆيرۋسىمەن جۇمىس ىستەپ جانە شەشەك اۋرۋلارىنا قارسى ەكپە جاساپ جيناعان تاجىريبەمىز بولعاندىقتان، ءبىزدىڭ ينستيتۋتتا مايمىل شەشەگىنەن قورعايتىن ۆاكسينا جاساۋ بويىنشا زەرتتەۋ جۇرگىزۋدىڭ بۇكىل مۇمكىندىكتەرى بار»، - دەدى كۇنسۇلۋ زاكاريا.

سونداي- اق اتالعان ۆاكسينانى جاساپ شىعارۋ ءۇشىن ارنايى عىلىمي- زەرتتەۋ باعدارلاماسى قاجەت ەكەنىن ايتتى. ول باعدارلامانى مەملەكەت قارجىلاندىرىپ، تاپسىرما بەرۋ ارقىلى قولداۋ كورسەتۋى قاجەت كورىنەدى. دەنساۋلىق ساقتاۋ مينيسترلىگىنىڭ سوڭعى دەرەكتەرى بويىنشا، قازاقستاندا مايمىل شەشەگىنىڭ ىقتيمال فاكتىلەرى تىركەلمەگەن. ال كۇنسۇلۋ زاكاريا باسقاراتىن بيولوگيالىق قاۋىپسىزدىك ماسەلەلەرى جونىندەگى عىلىمي- زەرتتەۋ ينستيتۋتىنىڭ ۇجىمى «QazVac» اتتى COVID-19 ينفەكسياسىنا قارسى وتاندىق ۆاكتسينانى جاساپ شىعارعانىن قازاقستاندىقتار جاقسى بىلەدى.

ەلىمىزدە وسى وتاندىق ۆاكسينانىڭ 500 مىڭ دوزاسىن شىعارۋ مۇمكىندىگى بار. قازىر اتالعان ۆاكسينانى دۇنيەجۇزىلىك دەنساۋلىق ساقتاۋ ۇيىمىنىڭ تىركەۋىنەن وتكىزۋ جۇمىستارى ءجۇرىپ جاتىر.

اۆتور: ەسىمجان ناقتىباي

Басты сөздер: قوعام,
Жоғары қарай