Ауа райы
Астана -4 °С
Алматы 1 °С
валюта бағамы
USD 445.84
EUR 490.47
RUB 5.73
CNY 62.87

БАӘ-ге органикалық өнімдерді жеткізуде Қазақстанның әлеуеті зор – Мемлекет басшысы

2020 жылдың 27 қаңтар 2020 21:43

ӘБУ-ДАБИ. ҚазАқпарат – Қазақстан мен Біріккен Араб Әмірліктерінің ауыл шаруашылығы саласындағы ынтымақтастығының әлеуеті жоғары. БАӘ бизнес өкілдерімен кездесуде Қазақстан Президенті Қасым-Жомарт Тоқаев осылай деді, деп хабарлайды ҚазАқпарат тілшісі.

«Ауыл шаруашылығы саласындағы ынтымақтастықты нығайтуда бізде зор әлеует бар. БАӘ барлық азық-түлік тұтынудың 85 пайызын импорттайтынын білеміз. Жақында дүниежүзілік азық-түлік қауіпсіздігін қамтамасыз ету үшін «Азық-түлік қауіпсіздігі жөніндегі ұлттық стратегия» қабылданғанын білеміз», - деді Қасым-Жомарт Тоқаев.

Мемлекет басшысы осы стратегия аясында агроөнеркәсіп кешеніндегі сауданы және тамақ өнімдерін өндіру технологияларын дамыту - маңызды бағыттардың бірі екенін атап өтті.

«Осы тұрғыдан қарағанда Қазақстанның Әмірліктерге органикалық және сапалы өнімдерді жеткізуде аумақтық, технологиялық және логистикалық әлеуеті бар. Осы өнімдерді БАӘ-ге тасымалдау үшін біз Әмірліктерді Қазақстанның тамақ өнімдерін өндіру саласына қаржы салуға шақырамыз. Әмірліктерде азық-түлік тұтыну деңгейінің 12 пайызға артқанын ескере отырып, біздің үкіметіміз бен компанияларымыз Қазақстаннан ұзақмерзімді азық-түлік тасымалын ұйымдастыруды ойластырып жатыр. Бізде үлкен әлеует пен мүмкіндіктер бар», - деп қорытындылады Қазақстан Президенті.


Жоғары қарай