Ауа райы
Астана 17 °С
Алматы 20 °С
валюта бағамы
USD 412.55
EUR 468.66
RUB 5.79
CNY 58.80

Батыс Қазақстанда алты күнде 3 мыңға жуық талапкер ҰБТ сынағынан өтті

2020 жылдың 27 маусым 2020 17:30

ОРАЛ. ҚазАқпарат – Батыс Қазақстан облысында алты күнде 3 мыңға жуық талапкер ҰБТ сынағынан өтті, деп хабарлайды ҚазАқпарат тілшісі.

БҚО білім басқармасының баспасөз қызметінен түскен мәліметке қарағанда, бүгін үміткерлер Оралда М.Өтемісов атындағы Батыс Қазақстан мемлекеттік университеті мен Жәңгір хан атындағы Батыс Қазақстан аграрлық-техникалық университетіндегі тестілеу пункттеріне келді.

БҚО бас мемлекеттік санитар дәрігерінің қосымша шектеу шараларын енгізу туралы қаулысына сәйкес 27, 28 маусым күндері Оралда қоғамдық көліктер жүрмейтіндіктен, талапкерлер үшін тасымал ұйымдастырылды.

Бұл жолы облыстық мектептер, Орал қаласы және Теректі аудандарының түлектері сынақ тапсырды. Алтыншы лекке қатысуы тиіс 443 түлектің 21-і өз еріктерімен тест тапсыруға келмеді. Қалған 424 түлек санитарлық талаптарды сақтай отырып, тапсырып шықты.

Бір атап өтетін жайт, бүгін ҰБТ талаптарын бұзғаны үшін тест тапсыруға жіберілмеген немесе аудиториядан шығарылған түлектер болған жоқ.

Осылайша, БҚО-да 5 мыңнан астам талапкер ҰБТ-ға қатысуға өтініш білдірсе, алты күнде соның 2900-і сынақтан өтті.

Еске сала кетейік, бұдан бұрын Оралда бір күнде 400-ден астам талапкердің ҰБТ тапсырғанын жазған болатынбыз.


Жоғары қарай