Ауа райы
Астана -9 °С
Алматы -6 °С
валюта бағамы
USD 421.58
EUR 496.83
RUB 5.53
CNY 62.20

Бауыржан Байбек: "Birgemiz" қорынан көмек алу үшін 2485 теңге төлеу керек деген ақпарат жалған

2020 жылдың 17 шілде 2020 12:23

НҰР-СҰЛТАН. ҚазАқпарат - Nur Otan» партиясы төрағасының бірінші орынбасары Бауыржан Байбек «Biz Birgemiz» ұраны аясында телеграм-боттар мен әртүрлі онлайн төлем жүйелері арқылы 50 мың теңгеден таратылып жатыр деген ақпаратты жоққа шығарды, деп хабарлайды ҚазАқпарат тілшісі.

«Әлеуметтік желілерде «Biz Birgemiz» ұраны аясында телеграм-боттар мен әртүрлі онлайн төлем жүйелері арқылы 50 мың теңгеден таратылып жатыр екен деген жалған ақпарат пайда болғанын хабарлаймын. Кейбір азаматтар қордың қайырымдылық көмегін алу үшін 2485 теңге мөлшерінде біржолғы жиынтық төлем төлеу қажет деген фейк хабар таратып жатыр», - деп жазды Бауыржан Байбек Facebook -тегі парақшасында.

Оның хабарлауынша, бұл ақпарат шындыққа жанаспайды. Қор қаражатынан берілетін материалдық көмек алушыларға екінші деңгейдегі банктер арқылы жеке тұлғаның карточкасына немесе ағымдағы есепшотына аудару тәсілімен беріледі.

«Бұл ретте қандай да бір құжат ұсыну немесе салық төлеу талап етілмейді. Сонымен қатар банктер ешқандай комиссия алмайды, егер алушының банк алдында несиесі бойынша қарызы болса да, бұл қаражат осы қарызды өтеу үшін ұсталмайды. Өздеріңіз білетіндей, Елбасының бастамасымен құрылған «Birgemiz» қоры алғашқы күннен бастап 550 мыңнан астам қазақстандық отбасыға атаулы көмек көрсетті. Сондай-ақ коронавируспен күреске жұмылдырылған 2 мыңнан астам медицина қызметкері де 50 мың теңгеден алды. «Jas Otan» белсенділері 300 мыңдай отбасыға азық-түлік себеттерін жеткізіп берді. Сонымен қатар Елбасы Нұрсұлтан Назарбаевтың тапсырмасы бойынша Мақтаарал ауданындағы су басудан зардап шеккен Достық ауылының тұрғындарына арнап жаңа үйлер салуға қордан 340 миллион теңге бөлінді», - дейді ол.

Бауыржан Байбек «Birgemiz» қоры ашық және есеп беру қағидаттары негізінде халықтың әлеуметтік әлсіз топтарына қолдау көрсету жұмыстарын ары қарай да жалғастыратынын жеткізді.

«Осындай күрделі кезеңде кейбір теріс ниетті жандардың қиындыққа душар болған азаматтардың сенімімен ойнауы өте өкінішті жәйт. Қор басшылығы мұндай алаяқтық әрекеттердің жолын кесу үшін құқық қорғау органдарына жүгінеді. Тағы да қайталап айтқым келеді, тек ресми ақпарат көздеріне ғана сеніңіздер!» - дейді ол.


Жоғары қарай