Ауа райы
Астана 26 °С
Алматы 30 °С
валюта бағамы
USD 412.55
EUR 468.66
RUB 5.79
CNY 58.80

«Birgemiz» акциясына белсене қатысқан волонтерлер марапатталды

2020 жылдың 11 маусым 2020 13:58

НҰР-СҰЛТАН. ҚазАқпарат - «Nur Otan» партиясының Орталық аппаратында коронавируспен күрес жағдайында мұқтаж азаматтарға қолдау көрсету бойынша «Birgemiz» республикалық акциясына қатысқан ең белсенді волонтерлер марапатталды. Оларға еліміздің Тұңғыш Президенті Нұрсұлтан Назарбаевтың атынан алғыс хат тапсырылды, деп хабарлайды ҚазАқпарат тілшісі.

Таяуда партия лидері қазақстандық әрбір волонтерға өз ықыласын білдіріп, алғыс хаттарға қол қойған еді.

«Төтенше жағдай кезінде «Jas Otan» бүкіл ел бойынша бес мыңнан астам еріктіні жұмылдырды. Олар демалыссыз жұмыс істеп, мұқтаж адамдарға көмек жеткізді. Нағыз патриоттардың, жауапкершілігі мол жас көшбасшылардың жаңа буыны қалыптасқаны қуантады. Олардың ең белсенділеріне арналған алғыс хаттарға қол қойдым», - деген еді Нұрсұлтан Назарбаев.

Салтанатты шара барысында «Nur Otan» партиясы төрағасының бірінші орынбасары Бауыржан Байбек «Jas Otan» жастар қанатының волонтерлері бүкіл ел бойынша 250 мыңнан астам отбасына азық-түлік себеттерін, маскалар мен ең қажетті заттарды жеткізіп бергенін атап өтті. Жасотандықтар алғашқылардың қатарында Мақтаарал ауданына аттанып, қазіргі кезде 500-ден аса жас су басудан зардап шеккен ауыл тұрғындарына ақысыз көмек көрсетуді жалғастырып жатыр.

«Өздеріңіз білетіндей, Елбасының бастамасымен «Nur Otan» партиясы Мемлекет басшысының қолға алған дағдарысқа қарсы шараларына қосымша мұқтаж қазақстандықтарға қарқынды көмек көрсетіп жатыр. Нұрсұлтан Назарбаевтың бастамасымен құрылған «Birgemiz» қорының желісі бойынша меценаттардың қолдауымен 470 мыңнан астам отбасы 50 мың теңгеден біржолғы төлемақы алды. Тұңғыш Президент қорымен бірге аса мұқтаж отбасыларға атаулы қолдау көрсету ұйымдастырылды. Осынау жұмыстарды атқаруда волонтерлеріміздің рөлі зор болды. Бұл ретте 2019 жылды Нұрсұлтан Әбішұлы «Жастар жылы» деп атаса, ал 2020 жылды ел Президенті Қасым-Жомарт Тоқаевтың «Волонтер жылы» деп жариялауы символдық мәнге ие болды. Сіздер өз отаншылдықтарыңызды, азаматтық пен жанашырлықтарыңызды таныта отырып, бүкіл қазақстандық жастарға үлгі көрсеттіңіздер», - деді Бауыржан Байбек.

Сонымен бірге төрағаның бірінші орынбасары жастарды алдағы партияішілік таңдау – праймеризге қатысуға шақырды.

«Өткен аптада партия лидері биылғы 17 тамыздан 3 қазанға дейінгі аралықта Праймериз өткізу туралы қаулыға қол қойған еді. Біздің мақсатымыз – алдағы Мәжіліс пен барлық деңгейдегі мәслихаттарға сайлауға партиялық тізімдер қалыптастыру үшін жаңа лидерлерді анықтау бойынша барынша ашық әрі бәсекелестік негізде іріктеу өткізу. Бұл ретте 35 жасқа дейінгі жастарға – 20%, ал әйелдер үшін – 30% квота көзделген. Осы арқылы біз дарынды да бастамашыл жастарымыз үшін партиялық «әлеуметтік лифтіні» қамтамасыз етпекпіз», – деді Бауыржан Байбек.

Осы аптаның ішінде Нұрсұлтан Назарбаевтың атынан алғыс хаттармен үш мыңдай қазақстандықты марапаттау жоспарланғанын атап өткен жөн. Олардың арасында партияның өңірлік филиалдарының волонтерлары мен белсенділері, сондай-ақ қайырымды меценаттар бар.

«Төтенше жағдай режимі енгізілген кезде көптеген адамдар қиын жағдайға тап болды. Менің оларға қандай да бір көмек бергім келді. Әлеуметтік желілерден «Nur Otan» партиясы мұқтаж азаматтарға азық-түлік жеткізіп беріп жатқанын және бұл іске көмек беретін еріктілер қажет екендігін білгеннен кейін мен бірден хабарластым. «Biz Birgemiz» секілді ауқымды акцияға қатысқаныма шексіз ризамын» - деп волонтер Эльмира Айғалиева өз әсерін бөлісті.

«Jas Otan» жастар қанаты белсенділерінің бірі Сергей Матюшенко өз кезегінде Елбасының алғыс хатын алу ерекше мәртебе екенін және адамдарға көмек көрсетуге қосымша күш-жігер сыйлайтынын атап өтті.








Жоғары қарай