Ауа райы
Астана 16 °С
Алматы 21 °С
валюта бағамы
USD 405.69
EUR 455.51
RUB 5.72
CNY 57.42

Биыл салық жеңілдіктері кәсіпкерліктің қай бағыттарына берілді

2020 жылдың 12 мамыр 2020 12:42

НҰР-СҰЛТАН. ҚазАқпарат – ҚР Ұлттық экономика вице-министрі Мәди Такиев биыл Қазақстанда салық жеңілдіктері қарастырылған кәсіпкерлік қызметтері туралы айтып берді, деп хабарлайды ҚазАқпарат тілшісі.

«Төтенше жағдай кезеңінде Үкімет Мемлекет басшысының тапсырмасы бойынша шағын және орта бизнесті қолдау үшін жедел шаралар қабылдады. Олар бизнестің қаржыландыруға қолжетімділігін арттыруды, қосымша салықтық ынталандыруды іске асыруды, бизнесті тексерулерден шектеуді көздейді. Олар саудадан бастап туристік бизнеске дейін экономиканың түрлі секторларын қамтиды», - деді М. Такиев Орталық коммуникациялар қызметіндегі баспасөз мәслихатында.

Осы орайда жыл соңына дейін сауда ойын-сауық орталықтары, кинозалдар, театрлар, көрмелер мен спорт объектілері бойынша, сондай-ақ қоғамдық тамақтану, қонақүй және туристік қызмет салаларында жұмыс істейтін салық төлеушілер бойынша мүлік салығынан босату шарасы белгіленді.

Мұнымен қоса, жеке практикамен айналысатындар да (нотариустер, адвокаттар, сот орындаушылары, медиаторлар) биылдың 1 қазанына дейін мүлік салығынан босатылды.

«Жалпыға бірдей белгіленген тәртіппен жұмыс істейтін жеке кәсіпкерлер жылдың соңына дейін жеке табыс салығынан босатылды. Ірі қара мал мен асыл тұқымды балапандарды қамтитын агроөнеркәсіптік кешендегі биологиялық активтердің импортына қосылған құн салығы салынбайды. Ауыл шаруашылығы өнімдерін өндірушілер ауыл шаруашылығы мақсатындағы жерлер бойынша жер салығын төлемейді», - деп түсіндірді вице-министр.

Айта кетейік, әлеуметтік маңызы бар азық-түлік тауарлары үшін қосылған құн салығының мөлшерлемесі 2020 жылдың 1 қазанына дейін 12 пайыздан 8 пайызға дейін төмендетілді.

«Микро, шағын және орта бизнес субъектілері 2020 жылғы 1 сәуірден бастап 1 қазанға дейін 29 қызмет түрі бойынша еңбекақы төлеу қорынан салық және басқа да міндетті төлемдерден босатылды», - деді ол.


Жоғары қарай