Ауа райы
Астана 23 °С
Алматы 26 °С
валюта бағамы
USD 412.55
EUR 468.66
RUB 5.79
CNY 58.80

Дәріні қымбат бағаға сату фактілері: ҚР ІІМ барлық өңірде рейд өткізуде

2020 жылдың 6 шілде 2020 14:07

НҰР-СҰЛТАН. ҚазАқпарат - ҚР Президенті Қасым-Жомарт Тоқаевтың тапсырмасымен Ішкі істер министрлігі дәрі-дәрмектердің бағасын қымбаттату фактілерін анықтау бойынша рейдтер өткізді, деп хабарлайды ҚазАқпарат тілшісі.

«Рейд барысында дәрі-дәрмектерді жаппай сатып алуды ұйымдастырған адамдар анықталды. Олар дәрі-дәрмектің жасанды тапшылығын тудырып, кейін дәрілерді нақты құнынан бірнеше есе артық бағамен қайта сатқан. Дәрі-дәрмектерді қайта сатудың көптеген фактілері еліміздің барлық өңірінде анықталды. Пысықай азаматтар дәрі-дәрмектерді фискалды чектерді шығармай сатқан. Салдарынан адамдар дәрілерді қымбат бағаға алуға мәжбүр болған», - деп атап өтеді министрліктен.

Мәселен, ведомство мәліметінше, Нұр-Сұлтан қаласында полицейлер қорғаныс құралдарын заңсыз сатудың жолын кесті. Жергілікті тұрғыннан медициналық маскалар, комбинезондар, термометрлер, медициналық көзілдіріктер мен антисептикалық құралдар тәркіленді.

Тағы бір жағдайда әйел адам интернет-ресурста хабарландыру беріп, Парацетамол, Ингавирин, Цефтриаксон, Азитромицин сияқты аса қажетті дәрі-дәрмектерді заңсыз сатқан. Елордадағы сауда, ойын-сауық орталықтарының бірінің тұрағында оның автокөлігінен аталған дәрілік препараттары бар екі қорап табылды.

Шымкент қаласында Левомак медициналық препаратын 12 000 теңгеге сатқан жергілікті тұрғын полицияға жеткізілді. Ол дәрі бағасын өз бағасынан 6 есе қымбатқа сатқан. Дәріханада провизор болып жұмыс істейтін Шымкент қаласының тағы бір тұрғыны Дексаметазон-Аджио препаратының ампулаларын 5 000 теңгеден берген, негізгі бағасы - 600 теңге.

Ал Түркістан облысында ер адам Аскорбин қышқылын 5 000 теңгеден сатқан, оның негізгі бағасы - 250 теңге.

Осыған ұқсас фактілер Алматы қаласында, Ақмола, Ақтөбе, Атырау, Шығыс Қазақстан, Жамбыл, Батыс Қазақстан облыстарында анықталып отыр.

Рейдтің алғашқы күнінде полиция учаскелеріне 21 адам жеткізілді.


Жоғары қарай