Ауа райы
Астана 9 °С
Алматы 8 °С
валюта бағамы
USD 421.58
EUR 496.83
RUB 5.53
CNY 62.20

Ержан Максим Польша мен Қазақстанда жеке концерт береді

2019 жылдың 26 қараша 2019 17:00

АЛМАТЫ. ҚазАқпарат – Eurovision Junior 2019 байқауының екінші орын жүлдегері Ержан Максим Польша мен Қазақстанда жеке концерт беретін болды.

Бұл туралы Алматыда өткен баспасөз мәслихаты барысында әншінің анасы Гүлмира Әлібек айтты, деп хабарлайды ҚазАқпарат тілшісі.

«Концерт туралы ұсыныс Польша елшілігінен түсті. Әзірге бұл мәселені жан-жақты қарап жатырмыз. Халық Ержанның өнерін жоғары бағалап отыр. Шамамен 2020 жылдың наурызына жоспарлап отырмыз. Бұл оның жеке концерті болады. Мұндай шараларды ұйымдастыру оңай емес. Әрине, барлық командамызбен ақылдасатын боламыз», - деді ол.

Оның айтуынша, Ержан Максимнің жеке концерті Қазақстанда Орал қаласында өтеді.

Концерт жазға жоспарланған.

Еске сала кетсек, Польшада өткен «Junior Eurovision-2019» ән байқауында бақ сынаған қазақстандық Ержан Максим екінші орын алған болатын. Қазылардың берген бағасы бойынша Ержан Максим бірінші орын алды. Ал онлайн дауыс беру қорытындысымен 79 ұпай жинады. Осылайша, қазақстандық әнші жалпы 227 ұпаймен екінші орын алды. Байқаудың бас жүлдесін 278 ұпай жинаған Польша өкілі Вики Габор жеңіп алды.

Айта кету керек, жас өнерпаз Алматыға бүгін түнде ұшып келді .

Бұған дейін ҚР Президенті Қасым-Жомарт Тоқаевтың Ержан Максимді ән байқауындағы жүлдесімен құттықтағаны хабарланған болатынбыз.

Көк туды желбіреткен жас әншіні Димаш Құдайберген де құттықтап, Instagram парақшасында «Құлыншақ, жеңісің құтты болсын! Екінші орын емес, мен үшін бірінші орын деп білемін!!! Жарайсың балапан!!!» деп жазды.

Өз кезегінде Ержан Максим қазақстандықтарға алғысын айтты. «Құрметті достарым, апа-ағаларым, ата-әжелерім. Маған дауыс бергендеріңіз үшін көп-көп рахмет! Осы жеңіске сіздердің арқаларыңызда жетіп отырмын», - деп жазды әнші.

Автор Гүлмира Ғосманәли
Басты сөздер: Мәдениет, Алматы,
Жоғары қарай