Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Футболдан ел чемпионы «Тобылдың» бас бапкері қызметінен кетті

2022 жылдың 16 мамыр 2022 11:09

НҰР-СҰЛТАН. ҚазАқпарат – Футболдан ел чемпионы «Тобыл» (Қостанай) клубының бас бапкері, қазақстандық маман Александр Москаленко қызметінен кетті, деп хабарлайды ҚазАқпарат тілшісі.

«Тобыл» футбол клубының баспасөз қызметі мәлім еткеніндей, тараптар екіжақты келісім бойынша келісім-шартты үзді.

Аталмыш футбол клубы А.Москаленкоға алғысын айтып, алдағы мансабында сәттілік тіледі.

«Осы уақытқа дейін «Тобыл» сапында бірнеше белесті бағындырдық. Қиын да қуанышты кезеңдер бастан өтті. Айтулы жеңістер де, ауыр жеңілістер де болды. Осының бәрін бір команда болып бастан кешірдік. «Тобыл» – алдына биік мақсат қойған ұжым. Бірақ осы жылы біз ойлағандай болмады. Оның өзіндік себептері де бар. Алайда мұнымыз тек ақталу сияқты естілуі мүмкін. Сол себепті артық сөйлемейін. Командаға алдағы уақытта сәттілік, мақсаттарының орындалуын тілеймін. Әр футболшыға, әкімшілік және медициналық штабқа алғысымды білдіремін», - деді Александр Москаленко.

А.Москаленко «Тобылды» өткен жылдың маусым айынан бері жаттықтырып келді. Өткен жылы қостанайлықтар 45 жастағы маманның басшылығымен ел чемпионы атанды. Сондай-ақ биыл суперкубокты да жеңіп алды. Алайда Қазақстан біріншілігінде соңғы жеті матчтың біреуінде ғана команда жеңіске жетті. Өткен турда «Ақтөбеден» 1:2 есебімен ұтылып қалды. Қазіргі кезде қостанайлықтар турнир кестесінде 15 ұпаймен жетінші орында ғана келеді.

Еске сала кетейік, бұдан бұрын футболдан ел чемпионатында «Тараздың» қайта бірінші орынға көтерілгенін жазған болатынбыз.


Автор Елжан Ералы
Басты сөздер: Спорт, Футбол,
Жоғары қарай