Ауа райы
Астана -9 °С
Алматы -8 °С
валюта бағамы
USD 421.58
EUR 496.83
RUB 5.53
CNY 62.20

Хоккей: «Барыс» мәскеулік «Спартакты» ұтты

2020 жылдың 29 қараша 2020 19:27

НҰР-СҰЛТАН. ҚазАқпарат – «Барыс» клубы Құрлықтық хоккей лигасының кезекті турында Мәскеудің «Спартагын» қабылдады, деп хабарлайды ҚазАқпарат тілшісі.

Осының алдында қатарынан бесінші рет жеңілген елордалық команданың жағдайы мәз емес-ті.

Турнир кестесінде 25 ұпаймен жалпы есепте 19-ыншы, ал Шығыс конференциясында 10-орында тұрған еді. Плей-офф додасына қатысуға мүмкіндік беретін үздік сегіздікке ілігу биыл «Барысқа» оңайға түспейтін түрі бар.

Ал 34 ұпай жинаған «Спартак» жалпы есепте 12-інші, Батыс конференциясында 6-сатыда тұрған болатын.

«Спартакпен» ойында бірінші кезеңде Кёртис Валк 13-минутта есеп ашты. Екінші кезеңде де осы үштік көзге түсіп, К.Валк, Линус Виделль қатысқан әдемі комбинациядан кейін Якоб Лилья есепті 2:0-ге жеткізді.

Ойын барысында елордалық хоккейшілер жиірек тәртіп бұзғанымен, оны мәскеуліктер пайдалана алмады.

Үшінші кезеңде 55-минутта қонақтардан Йори Лехтеряның пасынан кейін Сергей Широков есепті қысқартты.

Осылайша «Барыс» 2:1 есебімен жеңіске жетті.

Келесі турда Юрий Михайлистің шәкірттері 1 желтоқсан күні өз айдынында «Сочи» клубын қабылдайды.

Еске сала кетейік, бұдан бұрын «Барыстың» қатарынан бесінші рет жеңілгенін жазған болатынбыз.

Фото/ hcbarys.kz



Автор Елжан Ералы
Басты сөздер: Спорт,
Жоғары қарай