Ауа райы
Астана -14 °С
Алматы -3 °С
валюта бағамы
USD 421.58
EUR 496.83
RUB 5.53
CNY 62.20

Қазақстан азаматтары отандық ғалымдар әзірлеген COVID-19-ға қарсы вакцинаны салдыруда

2020 жылдың 18 қазан 2020 21:48

НҰР-СҰЛТАН. ҚазАқпарат - Қазақстан азаматтары өз еріктерімен отандық ғалымдар әзірлеген коронавирусқа қарсы вакцинаны тәжірибе ретінде салдырылып жатыр. Солардың бірі - саясаттанушы Мақсат Жақау вакцинациядан өткендігін Facebook парақшасында жария етті, деп хабарлайды ҚазАқпарат тілшісі.

«Бүгін адамзаттың қас жауына айналған COVID-19-ға қарсы отандық вакцинаны арнайы медициналық тексерулерден іріктеліп, өз еркіммен салдырдым. Қатысушылар көп. Бірақ денсаулықтарына байланысты көбі өтпеді. 18-бен 50 жас аралығындағы кандидаттар тізімімен вакцинацияның екінші кезеңінде тәжірибелік топқа ендім. Вакцинаны жасаумен медицина ғылымында есімдері әлемге танылған профессорлар айналысты. Бұл ғылымымыздың жоғарғы көрсеткішін танытады. Бұйырса вакцинаның оң нәтижелеріне қарай еліміздің ғана емес, әлемдік деңгейде адамзаттың игілігіне қолданатын ем-домның шығуына сенуіміз керек. Бастысы вирус болса оның антивирусы да болуы керек. Отандық ғылым сол жолда ізденіс үстінде», - дейді Мақсат Жақау.

Айта кетейік, ҚР Білім және ғылым министрі Асхат Аймағамбетов те коронавирус індетіне қарсы әзірленген отандық вакцинаны салдырғандығын айтқан болатын.

Бұған дейін ҚР БҒМ Ғылым комитетінің Биологиялық қауіпсіздік проблемалары ғылыми-зерттеу институтында әзірленген коронавирус инфекциясына қарсы QazCovid-in вакцинасын клиникалық зерттеу басталған хабарлаған едік.


Жоғары қарай