Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Қазақстан мен Ресей аусыл ауруына байланысты мал мен оның өнімдерінің тасымалына шектеу қойды

2022 жылдың 13 қаңтар 2022 10:38

НҰР-СҰЛТАН. ҚазАқпарат - Қазақстан мен Ресей аусылға сезімтал жануарлар мен олардан алынатын өнімдер мен шикізатты тасымалдауға уақытша шектеу қойды, деп хабарлайды ҚазАқпарат ҚР Ауыл шаруашылығы министрлігінің баспасөз қызметіне сілтеме жасап.

ҚР Ауыл шаруашылығы министрлігі Ресей Федерациясы Орынбор облысының Беляев ауданында аусыл ауруының тіркелуінің нәтижесіне орай 31 желоқсан 2021 жылы ҚР АШМ Ветеринариялық бақылау және қадағалау комитеті аусылға сезімтал жануарларды, жануарлардан алынатын өнімдер мен шикізатты Қазақстан Республикасына әкелуге және Орынбор облысынан транзитке уақытша шектеулер енгізгенін хабарлайды.

Сонымен бірге, Ресей Федерациясының ветеринарлық және фитосанитарлық қадағалау жөніндегі федералдық қызметі 2022 жылғы 12 қаңтардан бастап сақтық қағидатына байланысты Қазақстан Республикасының аумағынан термиялық өңдеуден өткен тауарларды қоспағанда, аусылға сезімтал тірі жануарларды, жануарлардан алынатын өнімдерді, шикізатты және азықтарды Ресей Федерациясына әкелуге уақытша шектеулер енгізді.

Ресей Федерациясында тіркелген аусыл ошағының мемлекеттік шекараға тікелей жақындығын ескере отырып, министрлік шекара маңындағы аумақта эпизоотиялық мониторинг жүргізу үшін жұмыс тобын құрды. Өңірлердегі жұмыс тобы ветеринария бойынша ұлттық референттік орталықта кейінгі зертханалық зерттеулер үшін сынамалар іріктеуді жүргізеді.

ҚР Ветеринариялық қызметі жүргізген жұмыстың қорытындысы мен нәтижелері бойынша тиісті шаралар қабылданатын болады.


Жоғары қарай