Ауа райы
Астана 15 °С
Алматы 25 °С
валюта бағамы
USD 412.55
EUR 468.66
RUB 5.79
CNY 58.80

Қостанай облысында тарихи-мәдени мұраны сақтау орталығы ашылмақ

2019 жылдың 9 желтоқсан 2019 13:08

ҚОСТАНАЙ. ҚазАқпарат – Қостанай облысының әкімдігінде өткен селекторлық жиында киелі нысандардың қолжетімділігін арттыру және инфрақұрылымды дамыту бойынша жасалған Жол картасының орындалу барысы талқыланды, деп хабарлайды ҚазАқпарат тілшісі.

Облыстық Мәдениет басқармасының басшысы Ерлан Қалмақовтың сөзінше, өңірде 29 киелі нысан бар. Атап айтқанда, жалпыұлттық маңызы бар – 10, өңірлік маңызы бар 19 нысан тіркелген. Олардың қолжетімділігін арттыру және инфрақұрылымды дамыту бойынша жасалған Жол картасының шеңберінде 175 млн теңге жұмсалған.

«Амангелді, Жангелдин, Денисов, Қостанай, Меңдіқара, Науырзым аудандарының әкімдіктері 2018-2020 жылдарға арналған Жол картасында көзделген іс-шараларды толық көлемде орындады. Жангелдин ауданында жалпы сомасы 3,65 млн теңгеге Қазыбай әулие мазарына құрылыс жұмыстары жүргізіліп, зиярат етуге келгендер үшін үй салынды. Қобызшы Тілеп Аспантайұлы жерленген жерде 12 млн теңгеге мавзолей тұрғызылды. Бейімбет Майлин ауданындағы Жабағы Ипанұлы батырдың жерленген жеріне қоршаулар мен қақпа орнатылып, кірме жол салынды. Жалпы, облыстың барлық киелі нысаны қанағаттанарлық жағдайда. Барлық объектілерде QR коды бар үш тілдегі ақпараттық тақтайшалар орнатылған», - деп мәлім етті Ерлан Қалмақов.

Осы жылы Қостанай облысының киелі жерлерінің тізіміне қосымша 9 нысан енгізілді.

Ерлан Қалмақов облыс әкіміне 2020 жылы тарихи-мәдени мұраны сақтау орталығын ашуды ұсынды. Орталықтың мақсаты өңірдің тарихи-мәдени мұрасын дәріптеу болмақ. Мұндай орталықтар еліміздің барлық өңірлерінде жұмыс істейді. Облыс әкімі Архимед Мұхамбетов мәдениет басқармасы басшысының ұсынысын қолдады. Сондай-ақ, ол өңірді таныстыратын 10-15 минуттық бейнефильм жасауды тапсырды.

Жоғары қарай