Ауа райы
Астана -19 °С
Алматы -5 °С
валюта бағамы
USD 421.58
EUR 496.83
RUB 5.53
CNY 62.20

Қостанайда кәріз құдығынан 3 жыл бұрын өлген адамның мәйіті табылды

2020 жылдың 28 қазан 2020 20:45

ҚОСТАНАЙ. ҚазАқпарат – Қостанайда кәрізден 2017 жылы өлген адамның мәйіті табылды, деп хабарлайды ҚазАқпарат тілшісі.

Ақпаратты агенттік тілшісіне облыстық полиция департаменті баспасөз хатшысы Ирина Беженарь растады.

«12 қазанда Қостанай қаласының полиция басқармасының кезекші бөліміне қоңырау келіп түсті. Жеке үйдің иелері кәріз құбырынан адамның мәйітін тапқанын хабарлаған. Ерлі-зайыптылар жағымсыз иісті сезіп, кəрізді тазартпақ болған. Алайда күтпеген жағдайға тап болып, тез арада полицияға хабар берген. Бұл дерек ҚР ҚК 99-бабы 1-бөлігі («Кісі өлтіру») бойынша тіркелді. Оқиға орнына 10 тәжірибелі қызметкерден тұратын жедел-тергеу тобы аттанды», - дейді И.Беженарь.

Қостанай қаласы криминалдық полиция бөлімінің бастығы Ербол Қарымсақовтың айтуынша, полицейлер кісі өлтірілген уақытта осы аумақта болған күдіктілерді іздестірді. Жедел уәкілдер мəйіттің жеке басын анықтауға кірісті. Тəртіп сақшылары із-түзсіз жоғалғандардың тізімін тексеріп, 2017 жылдың қарашасынан бері хабар-ошарсыз жоғалып кеткен қала тұрғынын анықтады.

Табылған мəйіттегі киім қалдықтары жоғалған адамның сипаттамасына сәйкес келді. «Жедел-іздестіру іс-шаралары барысында полиция қызметкерлері ерлі-зайыптылардың үш жыл бұрын өрттен кейін үйді қалпына келтіру үшін жұмысшыларды жалдағанын анықтады. Полицейлер аталмыш үйді жөндеуге қатысқан жұмысшыларды, күдіктілерді құрықтады. Қазіргі уақытта олар қамауда. Тергеу амалдары жүргізілуде. Қылмыстық іс аясында өлген адамның жеке басын толықтай анықтауға, сондай-ақ, осы қылмыстың себептерін және күдіктілердің әрқайсысының оған қатысу дәрежесін ашуға көмектесетін төрт сараптама тағайындалды», делінген ведомство хабарламасында.



Жоғары қарай