Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Мемлекет басшысына экологиялық ахуалды жақсарту үшін қабылданған шаралар туралы баяндалды

2021 жылдың 23 желтоқсан 2021 18:05

НҰР-СҰЛТАН. ҚазАқпарат - Мемлекет басшысы Қасым-Жомарт Тоқаев Экология, геология және табиғи ресурстар министрі Серікқали Брекешевті қабылдады, деп хабарлайды ҚазАқпарат Ақордаға сілтеме жасап.

Қасым-Жомарт Тоқаевқа министрліктің биылғы атқарған жұмыстарының негізгі қорытындылары мен даму перспективалары, сондай-ақ Мемлекет басшысының Жолдауы аясында берілген тапсырмалардың іске асырылу барысы туралы есеп берілді.

Серікқали Брекешев Мемлекет басшысына еліміздегі экологиялық ахуалды жақсарту үшін қабылданып жатқан шаралар мен су саласын дамыту жоспары туралы баяндады. 2025 жылға дейінгі «Жасыл Қазақстан» ұлттық жобасы аясында еліміздің 6 облысында жалпы құны 1,7 миллиард теңге болатын 9 су қоймасы салынады. Сондай-ақ Су шаруашылығы комитетінің, аумақтық бассейндік инспекциялардың қызметін күшейту көзделеді.

Кездесу барысында геология саласын дамыту мәселелеріне ерекше назар аударылды. Министрдің айтуынша, жер қойнауына жүргізілетін мемлекеттік геологиялық зерттеу жұмыстары жандандырылып жатыр. Шамамен 684 шаршы шақырым жер қойнауын зерттеу жоспарланып отыр. Сонымен қатар Ұлттық геологиялық қызмет құрылады.

Президентке ауқымды көгалдандыру жұмыстары жөніндегі тапсырманың орындалу барысы туралы есеп берілді. Серікқали Брекешев биыл 62 мың гектар жерге 130 миллион көшет егілгенін айтты. Бұл бағыттағы жұмыстар жалғаса береді.


Жоғары қарай