Ауа райы
Астана -1 °С
Алматы -3 °С
валюта бағамы
USD 421.58
EUR 496.83
RUB 5.53
CNY 62.20

Өмірзақ Шөкеев онлайнда дауыс берді

2020 жылдың 1 қазан 2020 22:24

ТҮРКІСТАН. ҚазАқпарат - Түркістан облысының әкімі Өмірзақ Шөкеев «Праймериз» ақпараттық жүйесі арқылы онлайн түрде дауыс беріп, өз таңдауын жасады. Бұл туралы өңір басшысы Facebook-тегі қоғамдық қабылдау парақшасында жариялады, деп хабарлайды ҚазАқпарат тілшісі.

Саяси додаға облыстан 1076 азамат қатысып жатыр. Олардың арасында түрлі сала өкілдері, жастар, көпбалалы аналар да бар. Өңір басшысының айтуынша, праймериздің артықшылығы мен шынайылығын қоғам жоғары бағалаула.

«Елбасы «Сенім. Диалог. Болашаққа нық қадам – Nur Otan партиясының 7 серпіні» бағдарламасында партия жұмысын жүйелі жаңғыртуды, жаңа заманның іскер тұлғаларына мүмкіндік беруді тапсырды. ҚР Президенті Қасым-Жомарт Тоқаев та мемлекеттік және сайланбалы органдардың жауапкершілігін арттыру бағытында тың ойлар қозғап, нақты тапсырмалар бергені де белгілі. Осы праймериз арқылы іскер, отаншыл, әділ, белсенді, білімді көшбасшылар іріктеліп шығады деп сенемін», – деді өңір басшысы.

Өмірзақ Шөкеев сондай-ақ, партияластарын дауыс беруге шақырды.

«Қазіргі таңда Түркістан облысына мемлекет тарапынан барынша қолдау көрсетіліп, тарихи шаһарда халықаралық талапқа сай ғимараттар салынып жатыр. Демографиялық өсімі жоғары, халқы еңбекқор өңірдің мәслихаттары да мықты болуы тиіс. «Nur Otan» партиясының праймеризі Түркістан облысын дамытуға үлес қосатын азаматтар шоғырын қалыптастыратыны анық. Барша қатысушыларға сәттілік тілеймін. Ал партияластарды белсенді түрде дауыс беруге шақырамын.», – деді Өмірзақ Шөкеев.





Жоғары қарай