Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

Петропавл маңында қамыс өртеніп, мұнай қоймаларына қауіп төнді

2022 жылдың 13 мамыр 2022 16:25

ПЕТРОПАВЛ. ҚазАқпарат – Петропавлдың маңында кезекті рет қамыс өртеніп, бұл жолы 300 метр жерде тұрған мұнай қоймаларына қауіп төнді. Өрт сөндірушілер жіті қимылдап, үлкен апаттың алдын алды, деп хабарлайды ҚазАқпарат тілшісі.

Солтүстік Қазақстан облысы төтенше жағдайлар департаменті баспасөз қызметінің мәліметінше, Петропавлдың сыртындағы өнеркәсіптік аймақта, Әуезов көшесі, 266 мекенжайында өрт шыққандығы туралы хабарлама «101» қызметіне сағат 9.12 минут кеткенде түскен.

Оқиға орнына Петропавлдың өрт сөндіру қызметтері жұмылдырылды. Өрттің батпақты аумақта шығуы, жел және жақын маңда өндірістік нысандардың, соның ішінде 300 метр жерде мұнай қоймаларының болуы мамандардың жұмысын қиындата түсті. Қызыл жалынмен күресте өрт сөндірушілермен бірге Оңтүстік-Орал теміржолының Петропавл бөлімшесінің әскерилендірілген өрт сөндіру командасы, жергілікті атқарушы органдардың, «Қызылжар Су» ЖШС күш-құрылымдары, мемлекеттік емес өрт сөндіру қызметінің мамандары – барлығы 73 адам және 21 техника жұмыс істеді.










Жалын шамамен 10 га аумақты шарпыды. Өрт сағат 11.19-да толық сөндірілді. Зардап шеккендер жоқ. Қазіргі уақытта өрттің неден шыққаны және келген шығын мөлшері есептеліп жатыр.

Петропавлда биыл қамыстың өртену жағдайлары жиілеп кетті. Соңғы ірі өрт Петропавлдағы Копай ықшам ауданында болды, қамыстан тараған жалыннан екі жеке тұрғын үй жанып кетті.

Ал өткен демалыс күндері СҚО-да 20 шақты өрт тіркелді.











Жоғары қарай