Ауа райы
Астана 7 °С
Алматы 27 °С
валюта бағамы
USD 399.51
EUR 447.33
RUB 5.78
CNY 56.10

Президенттің баспасөз хатшысы Мемлекет басшысының жұмыс кестесі туралы айтып берді

2020 жылдың 12 наурыз 2020 18:49

НҰР-СҰЛТАН. ҚазАқпарат – ҚР Президентінің баспасөз хатшысы Берік Уәли әлемдегі коронавирус жағдайының Қасым-Жомарт Тоқаевтың жұмыс кестесіне әсері туралы сұраққа жауап берді, деп хабарлайды ҚазАқпарат.

«Әрине, коронавирустың әлемге таралуы жағдайы Мемлекет басшысының жұмыс кестесіне де әсер етті. Бұған дейін хабарлағанымыздай, пандемияға қарсы алдын-алу шаралары аясында Президенттің қатысуы жоспарланған бірқатар шаралар тоқтатылды. Оның ішінде Наурызды тойлау, Ұлы Отан соғысындағы Жеңістің 75 жылдығына арналған парад бар. Бұған дейін Мемлекет басшысы 8 наурызға арналған салтанатты жиын мен мерекелік концертті де тоқтатқан болатын. Мұның барлығы азаматтардың қауіпсіздігі мен саулығы үшін жасалуда», - деді Берік Уәли.

Оның айтуынша, Президенттің халықаралық кездесулер кестесіне де өзгерістер енгізілді.

«Қазіргі уақытта әлем бойынша сапарлар, екіжақты және көпжақты кездесулер, келіссөздер тоқтатылып жатыр. Сондықтан, Қазақстанда да бірқатар сыртқы саяси шаралар, оның ішінде Дүниежүзілік сауда ұйымына мүше елдердің министрлерінің кездесуі сынды жиындар кейінге қалдырылып немесе тоқтатылып жатыр.

Сонымен бірге, Президенттің жұмыс кестесінің босап қалмағанын да атап өткен жөн. Пандемия біздің ұлттық мүдделерімізді қозғайтын экономикаға, қаржыға және халықаралық қатынастарға ықпал етуде. Сондықтан Мемлекет басшысы жаңа сынақтар мен қауіп-қатерлер жағдайындағы елдің стратегиялық даму мәселелерін шешуге мән беріп отыр. Сонымен бірге, ол жедел әрекет етуге көбірек көңіл бөледі: жиналыстар мен кездесулер өткізеді, жағдайды қадағалайды және тиісті ведомстволардың жұмысын тұрақты бақылауда ұстап отыр», - деді Б. Уәли.


Жоғары қарай