Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Шымкентте тұратын Нұрсұлтан Назарбаев: Бұл есімді иелену мен үшін үлкен абырой

2021 жылдың 1 желтоқсан 2021 09:58

ШЫМКЕНТ. ҚазАқпарат - Шымкент қаласында Елбасымен аттас азамат тұрады. Аты — Нұрсұлтан. Тегі — Назарбаев. Яғни, Нұрсұлтан Назарбаев. «НазМед» медицина орталығында бас дәрігер болып қызмет атқаратын ол, Елбасымен аттас болу үлкен жауапкершілік жүктейтіндігін айттады.

«Бұл есімді иелену мен үшін үлкен абырой, мақтаныш, әрі үлкен жауапкершілік. Ең бастысы Елбасының атына кір келтермеуім керек. Мектепте жақсы оқыдым. Жоғары оқу орнын да үздік бітірдім. Әрдайым Елбасындай көшбасшы болуға ұмтылдым», – дейді ол.

Нұрсұлтан Нәліханұлы 1989 жылы Ташкент қаласында дүниеге келген. Атасы Назарбай сол кездегі Қазақстан Компартиясы Орталық Комитетінің хатшысы қызметін атқарып жүрген Н.Ә.Назарбаевтың жолын берсін деген ниетпен есімін Нұрсұлтан қойыпты. Себебі, сол кездегі қазақ жастарының арасынан шыққан көшбасшыға деген отбасының құрметі жоғары болған.

«Біз үйде бір қыз, екі ұлмыз. Үлкеніміз — Гүлжанат. Ал, менен кейінгі інімнің есімі Нұрислам. Ол дүниеге келген кезде Өзбекстан мен Қазақстан арасындағы достық беки түскен болатын. Сондықтан атам, екі ел Президенттерінің есімдеріндегі «Нұр» және «Ислам» сөздерін алып, «Нұрислам» деп атады», – дейді ол.




30 жастан енді асқан Нұрсұлтан Назарбаевпен кездескен жандар есімін естіген кезде таң қалысады екен. Алғашқыда сенбейтіндер, куәлігін көрген соң, суретке түсіп, сельфи жасайды.

«Алдыма келген пациенттер бейджигімде жазылған есімімді көріп, сенбей қайта сұрап жатады. Іс-сапармен жүріп, кей мекемелерге тіркелмекші болып, құжатымды ұсынған кезде де бетіме таң қалысып қарайтындар көп. Бірде жол патрульдік полиция қызметкері тоқтатты. Шені аға лейтенат екен. Құжаттарымды көрісімен капитанын шақырып, есімім жазылған құжаттарды көрсетті. Екеуіде күліп қарап, сәттілік тіледі», - дейді Нұрсұлтан.

Жалпы Шымкенттік Назарбаевтар отбасын көпшілік дәрігерлер династиясы деп біледі. Әкесі мен әпкесі ақ халат киіп, халыққа қызмет етіп жүр. Ал, Нұрсұлтанның өзі бүгінде ғылым жолын ұстанған. Магистрлікті тәмамдап, докторлықты оқып жатыр. Әрі кәсіби маман. Білікті басшы. Жоғары дәрежелі хирург.

«Адамда арман көп қой. Менің бір арманым — Елбасымен кездессем», – дейді ол.








Жоғары қарай