Ауа райы
Нур-Султан +7 °С
Алматы +14 °С
валюта бағамы
USD 449.85
EUR 485.43
RUB 5.71
CNY 70.69

СҚО-ға биыл 124 мыңнан астам турист келген

2021 жылдың 15 желтоқсан 2021 10:42

ПЕТРОПАВЛ. ҚазАқпарат – Солтүстік Қазақстан облысына биыл тоғыз ай ішінде 124 мыңнан астам турист келді, бұл өткен жылмен салыстырғанда шамамен екі есе көп, деп хабарлайды ҚазАқпарат тілшісі.

Өңірлік коммуникациялар қызметінде СҚО-ның кәсіпкерлік және индустриялық-инновациялық даму саласының биылғы жұмысы қорытындыланып, келер жылға жоспарлары айтылған баспасөз мәслихаты өтті. Басқарма басшысының орынбасары Данияр Исаевтың айтуынша, коронавирус індетіне қарамастан өңірге келген туристер саны артқан. Биыл облысқа тоғыз ай ішінде 124,2 мың адам келген, өткен жылдың осы кезеңінде өңірде 69,5 мың адам болған.

«Имантау-Шалқар курорттық аймағы республикалық маңызы бар ТОП-10-ға кірді. Бұл аймақта туристердің жақсы демалуына жағдай жасалып жатыр. Соңғы үш жылда 250 км жол жөнделді. Экология, геология және табиғи ресурстар министрлігімен бірге курорттық аймақта, ұлттық парк аумағында 17,5 км жолды салу, электр желілерін тарту және абаттандыруға жобалық-сметалық құжаттары әзірленіп жатыр», - дейді Данияр Исаев.

Айыртау ауданындағы Имантау-Шалқар курорттық аймағында қазір 40 демалыс базасы, оның жетеуі жыл бойы жұмыс істейді. Биыл 45 орынға шақталған «Имантау демалыс базасы және 24 орындық «Эккерт С.А.» қонақ үйлері ашылды.

«Бұдан басқа 200-ге жуық орындық 8 жоба жүзеге асып жатыр. «Шалқар Су» санаторийінде 1 млрд теңгеге күрделі жөндеу басталды. Демалыс орны 120 орынға арналған. Келер жылдары 5 үлкен жобаны жүзеге асырмақпыз, олар: көпсалалы туристік кешеннің, глэмпингтердің, «Балалар» спорттық-ғылыми балалар лагерінің және эко-отельдің құрылысы», - дейді басқарма басшысының орынбасары.

Маманның айтуынша, келер жылдан бастап туристік нысандарды салып, жаңғыртқандарға шығындарының 10 %-ы, автокөліктерді сатып алғандарға 25 %-ы, жол бойында сервис нысандарын салушылардың жұмсаған қаржысының 10 %-ы және санитарлық-гигиеналық тораптарды ұстауға бекітілген төлем – 83,3 мың теңге қайтарылмақ.


Жоғары қарай