Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Ұлттық банк азық-түлік бағасын бақыламай, еркіне жіберген өңірлерді атады

2021 жылдың 11 қараша 2021 19:08

НҰР-СҰЛТАН. ҚазАқпарат – Ұлттық банк азық-түлік бағасы өрескел қымбаттаған өңірлерді атады, деп хабарлайды ҚазАқпарат тілшісі.

«Жалпы ел бойынша азық-түлік бағасы бір айда 0,7% өсті. Әсіресе Шығыс Қазақстан (1,2%), Павлодар және Солтүстік Қазақстан (1,1%) облыстарында қымбатшылықтың қарқыны қатты. Жеміс пен көкеніс бағасы1,5% қымбаттаған. Әсіресе қырыққабаттың бағасы Алматы қаласында 17,7% артты. Ал жұмыртқаның бағасы Алматыдан басқа өңірлердің бәрінде көтерілді. Ең жоғарғы өсім Атырау облысында тіркелді (30,2%)», - деп жазылған Ұлттық банктің инфляция туралы сараптамасында.

Ресми мәліметте, азық-түлік тауарын ауыздықсыз жіберген Шығыс Қазақстан облысындағы ахуал жеке талданған.

«Өңірде жоғарғы сұрыпты бидай ұнынан пісірілген нан 6,2%, қарақұмық жармасы 3,3%, жеміс пен көкеніс 3,4% қымбаттады. Бұл тауарлардың республикалық орташа бағасы 0,9%, 0,5% және 1,5% көтерілген», - деп жазады Ұлттық банк мамандары. .

Шығыс Қазақстаннан кеінгі орында тұрған Павлодар облысында 1-сұрыпты бидай ұнынан пісірілген нан 5,1%, қара бидай наны 2,9% қымбаттаған.

Ал Солтүстік Қазақстан және Ақтөбе облыстарында ет пен ет өнімдері 2 және 1,3% қымбаттаған.

«Ақтөбе облысында құс еті бір айда 8,6% қымбаттады. Солтүстік Қазақстан облысында жылқы еті 2,9%, ал қой еті 3,8% қымбаттады. Ал республика бойынша бұл өнімдердің бағасы 0,3 және 0,4% ғана көтерілген», - делінген Ұлттық банк талдауында.


Жоғары қарай