Ауа райы
Астана -25 °С
Алматы -7 °С
валюта бағамы
USD 421.58
EUR 496.83
RUB 5.53
CNY 62.20

Үй жануарларын қорғау туралы құжат қоғамда талқылануда

2020 жылдың 5 тамыз 2020 12:21

НҰР-СҰЛТАН. ҚазАқпарат – Жануарларды қорғаудағы азаматтық бастамаларды қаржыландыру идеясын ілгерілету шаралары қабылданады. Бұл туралы Экология, геология және табиғи ресурстар министрі Мағзұм Мырзағалиев мәлім етті, деп хабарлайды ҚазАқпарат тілшісі.

«Бүгін біз Парламент Мәжілісінің бір топ депутаттары әзірлеген үй жануарларын қорғау туралы заң жобасын қоғаммен талқылауға жиналып отырмыз. Қазақстанда жануарларды қорғау туралы жаңа заң жобасының қажеттілігі әлдеқашан жетілген. Қазіргі уақытта барлық жануарларға, оның ішінде, үй, жабайы және ауыл шаруашылығы жануарларына жауапкершілікпен қарау туралы бірде-бір заң жоқ. Жануарларға қатыгездік көрсеткен адамдар туралы хабарламалар әлеуметтік желілерде жиі кездесіп жатыр. Алайда, бүгінде Қазақстандағы жануарларға қатыгездік көрсеткені үшін тағайындалатын жаза тым жеңіл. Сондықтан, Мемлекет басшысы Қасым-Жомарт Кемелұлының тапсырмасы бойынша, бірінші кезекте, жануарларды хайуанаттар бағында ұстауға қойылатын талаптарды қатаңдатуды алға қойып отырмыз. Сондай-ақ, жануарларды қорғаудағы азаматтық бастамаларды қаржыландыру, зоологиялық волонтерлікті қолдау мен оқушылар, студенттер арасында да жануарларға жауапкершілікпен қарау идеясын ілгерілету шараларын қабылдау жоспарда бар», - деді министр онлайн режимде өтіп жатқан талқылауда.

Осы орайда ол соңғы кездері жануарларға қатыгездікпен қарау фактілері қоғамда кеңінен талқыланғанын еске салды.

«Шын мәнінде проблема өте күрделі. Зерттеулерге қарағанда, жануарларға қатысты жасалған қатыгездік салдары кейіннен адамдарға да қатыгездікпен қарау секілді қайғылы жағдайларға алып келеді. Яғни қоғамда психикасы бұзылған адамдардың пайда болуына ықпал етуі мүмкін. Осы орайда қоғамда өнегелілік қағидаларын, барлық жануарларға жауапкершілікпен қарау нормаларын кеңінен насихаттау керек», - деді М. Мырзағалиев.

Оның сөзіне қарағанда, осы процеске қоғамды көптеп тарту керек.

«Осы салада түрлі жағымсыз көріністерге нақты заңнамалық тосқауыл қоюымыз керек және заңды бұзғандарға тиісті жазасын беру қажет. Өздеріңіз білесіздер, осы сипаттағы қылмыстар үшін жаза өте жеңіл. Сондықтан оны қатаңдатқан дұрыс. Атап айтқанда, аталған мәселені ескере отырып, заң жобасын жан-жақты пысықтау үшін бүгінгі талқылауды ұйымдастырдық. Осы орайда заң жобасының нормаларын талқылау мен қалыптастыруға белсенді қатысуға шақырамыз», - деді ведомство басшысы.

Еске сала кетсек, Мемлекет басшысы Қасым-Жомарт Тоқаев табиғатқа зиянын тигізген заңбұзушыларға салынатын айыппұл құнын ұлғайтуды тапсырды.

Сондай-ақ, Президент тапсырмасымен мектеп бағдарламасына «Балалардың экологиялық білімі» атты жаңа пән енгізіледі.

Жоғары қарай