Ауа райы
Астана 18 °С
Алматы 16 °С
валюта бағамы
USD 412.55
EUR 465.73
RUB 5.79
CNY 58.91

Жамбыл облысында баласы құқық бұзған мектеп оқушысының ата-анасына айыппұл салынды

2020 жылдың 4 маусым 2020 10:11

НҰР-СҰЛТАН. ҚазАқпарат – Жамбыл облысында мектепте оқитын баласы құқық бұзған ата-анаға 20 АЕК көлемінде айыппл салынды.

Бұл туралы ҚазАқпарат ҚР Білім және ғылым министрлігінің педагогтердің құқықтарын бұзу фактілері бойынша қабылданған нақты шаралар туралы мәліметтеріне сілтеме жасап хабарлайды. Бұл мәліметті министрліктің баспасөз қызметі таратты.

«2020 жылдың сәуірінде педагогті кәсіби қызметіне қатысы жоқ әртүрлі жұмыстарға тартуға жол бермейтін, педагогтердің құқықтарын қорғау жөніндегі жаңа нормалар күшіне енді. Бүгінгі күні Білім беру саласында сапаны қамтамасыз ету жөніндегі аумақтық департаменттер педагогтердің құқықтарын бұзу фактілері бойынша бірқатар шаралар қабылдады. Педагогке тауарлар мен көрсетілетін қызметтерді сатып алу міндеттерін жүктеу фактісі бойынша Қостанай облысындағы орта мектеп директорына «ескерту» түріндегі әкімшілік жаза қолданылды»,-делінген хабарламада.

Сондай-ақ онда Шымкент қаласы мен Жамбыл облысының екі мектебінің директорларына мұғалімдерді оқу кабинеттерін жөндеуге тартқаны және педагогтерден ҚР заңнамасында көзделмеген есептілікті талап еткені үшін «ескерту» түріндегі әкімшілік жаза қолданылғандығы айтылған.

Сонымен қатар, Жамбыл облысында мектеп мұғалімінің ар-намысы мен қадір-қасиетіне нұқсан келтіретін былапыт сөздермен қорлау жағдайы анықталды. Аталған құқық бұзушылық үшін бесінші сынып оқушысының ата-анасына 20 АЕК көлемінде айыппұл салынып, әкімшілік жауапқа тартылды.

«Осылайша, білім беру саласындағы уәкілетті орган педагогтердің Қазақстан Республикасының заңнамасымен бекітілген құқықтары мен заңды мүдделерін бұзатын азаматтық және лауазымды тұлғаларға қатысты заңнамада көзделген барлық шараларды қолданады. Педагогтердің құқықтары бұзылған жағдайда орналасқан жері бойынша аумақтық департаментке хабарласуды ұсынамыз»,-делінген баспасөз қызметінің мәліметтерінде.


Жоғары қарай