Aýa raıy
Astana 29 °S
Almaty 35 °S
valıýta baǵamy
USD 412.55
EUR 468.66
RUB 5.79
CNY 58.80

10 shilde. QazAqparat kúntizbesi

2020 jyldyń 10 shilde 2020 07:00

NUR-SULTAN. QazAqparat - QazAqparat óz oqyrmandaryna 2020 jylǵy 10 shildege arnalǵan kúntizbeni usynady.

ESTE QALAR OQIǴALAR

1965 jyly Mańǵystaý munaıynyń birinshi eshelony munaı óńdeý ónerkásibine jóneltildi.

1992 jyly Qazaqstan Respýblıkasy Mınıstrler Kabınetiniń qaýlysymen Almaty qalasyndaǵy Qazan tóńkerisiniń 50 jyldyǵy atyndaǵy sport saraıyna aqyn, ánshi jáne kompozıtor Balýan Sholaqtyń esimi berildi.

2009 jyly Almaty oblysyndaǵy Talǵar aýdany Elaman aýylynda «Qazaqstan-Qytaı» gaz jelisi alǵashqy bóliginiń dánekerleý jumystary aıaqtaldy.

Bul joba Túrikmenstannyń tabıǵı gazyn Qazaqstan aýmaǵy arqyly Qytaıǵa jetkizý maqsatynda júzege asyrylýda. Sonymen qatar, Qazaqstannyń batys óńirindegi tabıǵı gazdy Qytaıǵa, Qyzylorda, Jambyl, Ońtústik Qazaqstan, Almaty oblystary men Almaty qalasyna tasymaldaý júzege asyrylady.

Gaz qubyry Ózbekstan men Qazaqstan shekarasynan bastalyp, Ońtústik Qazaqstan, Jambyl, Almaty oblystarynyń aýmaǵynan Qytaımen shekaralas Qorǵas beketine deıin jetkiziledi. Qubyr jelisiniń jalpy uzyndyǵy 1304,5 shaqyrymdy quraıdy.

2013 jyly Batys-Qazaqstan oblysynyń arheologtary Qazaqstanda ortaǵasyrlyq qalalyq mádenıet bolǵanyn aıǵaqtaıtyn zattar tapty. Tabylǵan «Tas oba» qalashyǵy Aqjaıyq aýdany Esensaı kentiniń mańynda ornalasqan. Bizdiń zamanymyzdyń XIII ǵasyrynda bolǵan dep esepteledi.

2013 jyly elimizde alǵash ret A. Syzǵanov atyndaǵy Hırýrgııa ǵylymı ortalyǵynda bir donordyń birneshe organyn (júregin, baýyryn jáne eki búıregin) tórt naýqasqa berý otasy jasaldy. Protseske 100-ge jýyq medıtsına qyzmetkeri, sonyń ishinde 22 hırýrg jumyldyryldy. Operatsııa jalpy 28 saǵat júrgizildi. Eń kúrdelisi - baýyr transplantatsııasy 17 saǵatqa sozyldy.

2014 jyly Astana Opera baletiniń ártisteri Aıgerim Beketaeva men Erkin Rahmatollaev Mılanda Expo-2015 aıasynda «La Skala» teatrynda ótetin eki gala-kontsertke qatysýǵa shaqyryldy.

2015 jyly Reseı Prezıdenti Vladımır Pýtın Qazaqstan jáne Reseı arasyndaǵy kópjosparly yntymaqtastyq baılanystyń damýyna qosqan úlesi jáne ıntegratsııalyq protsesterdiń ilgerileýi boıynsha ekijaqty ózara is-qımyldaǵy belsendiligi úshin Qazaqstan Respýblıkasynyń Prezıdenti Nursultan Nazarbaevqa «Aleksandr Nevskıı» ordenin tabystady.

«Aleksandr Nevskıı» ordenimen Reseı Federatsııasymen kópjaqty yntymaqtastyqtyń damýyna úles qosqan kórnekti sheteldik saıası jáne qoǵam qaıratkerleri, ózge memleketterdiń iskerlik qoǵamdastyq ókilderi marapattalady.

2017 jyly Berlın qalasynda júzýden Germanııa ashyq chempıonatynda Rıo-de-Janeırodaǵy Paralımpıada oıyndarynyń chempıony Zýlfııa Ǵabıdýllına 200 metrge erkin júzýden aqtyq synda 03:26,65 kórsetkishimen jańa álemdik rekord ornatty.

2018 jyly Baıqońyr ǵarysh aılaǵynan ushqan «Progress MS-09» júk tasymaldaýshy ǵarysh kemesi Halyqaralyq ǵarysh stantsııasymen sátti túıisti. Ǵarysh kemeleriniń tarıhynda alǵash ret «Progress» qysqa eki aınalymdy shema boıynsha ushty. Zymyran tabany ǵarysh aılaǵynan úzilgennen orbıtalyq stantsııamen túıiskenge deıin 3 saǵat 40 mınýt ýaqyt jumsaldy.

2018 jyly Kembrıdjde (Ulybrıtanııa) «Rýhanı jańǵyrý» baǵdarlamasyn iske asyrý jónindegi Ulttyq komıssııa men Kembrıdj ýnıversıteti baspahanasy arasynda yntymaqtastyq týraly memorandýmǵa qol qoıyldy. Qazirgi zamanǵy qazaq ádebıeti antologııasy jınaǵyn BUU-nyń alty tiline aýdarý jumysy «Jahandyq álemdegi qazirgi qazaqstandyq mádenıet» jobasy aıasynda júzege asyrylýda. Joba - Elbasy Nursultan Nazarbaevtyń «Rýhanı jańǵyrý» baǵdarlamasynyń mańyzdy bóligi. «Jahandyq álemdegi qazirgi qazaqstandyq mádenıet» jobasynyń maqsaty - Qazaqstan táýelsizdik alǵannan bergi bizdiń ádebıettiń, mýzyka jáne beıneleý óneriniń, horeografııa, kıno men teatrdyń jetistikterin álemge pash etý.

2019 jyly Shyǵys Qazaqstannyń Tarbaǵataı aýdanyndaǵy Eleke sazy jaılaýynda Patsha qorǵanynan altynmen aptalǵan buǵynyń bastary shyqty. «Patsha qorǵanynan» tabylǵan jádigerlerdiń arasynda múıizi altyn symnan órilgen buǵy basynyń usaq pishinderi bul ólke úshin tyń týyndy.

Basty sózder: Kúntizbe,
Joǵary qaraı