Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

17 sáýir. Týǵan kún ıeleri

2021 jyldyń 17 sáýir 2021 08:10

NUR-SULTAN. QazAqparat - Búgin, ıaǵnı 17 sáýirde tulǵalardan kimder dúnıege kelgen? QazAqparat oqyrmandaryna esimder kúntizbesin usynady.

ESІMDER




93 jyl buryn (1928-2011) Qazaqstan Respýblıkasy Memlekettik syılyǵynyń ıegeri, jazýshy, ádebıet zertteýshi ǵalym, jýrnalıst Jumaǵalı YSMAǴULOV dúnıege kelgen.

Qostanaı oblysynda týǵan. Qazaq memlekettik ýnıversıtetin, KOKP Ortalyq komıteti janyndaǵy Qoǵamdyq ǵylymdar akademııasynyń aspırantýrasyn bitirgen. 1943-1946 jyldary - Qostanaı oblysy Semıozer aýdandyq gazetiniń jaýapty hatshysy. 1949-1954 jyldary - «Qazaqstan kommýnısi» jýrnalynyń bólim meńgerýshisi, jaýapty hatshysy. 1952-1954 jyldary - «Úgitshi bloknoty» jýrnalynyń redaktory. 1954-1958 jyldary Qazaqstan Kompartııasy Ortalyq komıteti úgit jáne nasıhat bóliminiń nusqaýshysy. 1961-1963 jyldary - «Qazaq ádebıeti» gazetiniń bas redaktory, Qazaqstan Jazýshylar odaǵy basqarmasy Qyzylorda oblysaralyq bólimshesiniń jaýapty hatshysy. 1963-1965 jyldary - Almaty oblystyq «Jetisý» gazetiniń bólim meńgerýshisi. 1965-1969 jyldary - Shyǵys Qazaqstan oblystyq «Kommýnızm týy» gazeti redaktorynyń orynbasary. 1969-1973 jyldary - Qazaqstan Kompartııasy Ortalyq komıteti janyndaǵy Partııa tarıhy ınstıtýty klassıkterdiń shyǵarmalaryn aýdarý sektorynyń meńgerýshisi. 1973-1987 jyldary - Qazaq telegraf agenttigi dırektorynyń orynbasary (qazirgi «QazAqparat» HAA), dırektory. 1987 jyldan Ádebıet jáne óner ınstıtýtynyń aǵa ǵylymı qyzmetkeri, bólim meńgerýshisi qyzmetterin atqarǵan. Baspasóz betterinde jarııalanǵan maqalalary «Marjan men mahabbat», «Adam meıiri» jınaqtaryna engen. Balzaktyń «Úzilgen úmitter», Stendaldyń «Qyzyl men qara», ıÝ.Bondarevtiń «Jaǵalaý», «Tańdaý», V.Anchıshkınniń «Arktıka ańyzy» romandaryn, V.Daldiń «Bókeı men Máýlen», E.Kazakevıchtiń «Kók dápter» povesterin qazaq tiline aýdarǵan.

J. Ysmaǵulov Qazaqstan Respýblıkasy Ulttyq ǵylym akademııasy M.Áýezov atyndaǵy Ádebıet jáne óner ınstıtýtynyń aǵa ǵylymı qyzmetkeri, fılologııa ǵylymynyń doktory, professor, Qazaqstan Respýblıkasy Áleýmettaný ǵylymdary akademııasynyń akademıgi boldy.

«Halyqtar dostyǵy», «Qurmet belgisi» ordenderimen jáne medaldarmen marapattalǵan.




49 jyl buryn (1972) akter, Qazaqstannyń eńbek sińirgen qaıratkeri, Qazaqstan Jastar odaǵy syılyǵynyń laýreaty, sporttyq «Oskar» ıegeri (AQSh, Antantık-Sıtı») Arman Tursynbaıuly ÁSENOV dúnıege keldi.

Germanııanyń Veımar qalasynda týǵan. 1994 jyly Qazaq aýyl sharýashylyq ınstıtýtyn, 1998 jyly Máskeýdegi S.Eızenshteın atyndaǵy rejısserlik kýrsyn («kıno óndirisi, mádenı jáne kópshilikke arnalǵan baǵdarlamalardyń uıymdastyrýshysy» mamandyǵy boıynsha), 2000 jyly QR Qarjy mınıstrliginiń Memlekettik qarjy ınstıtýtyn (qarjy menedjmenti) támamdaǵan.

Eńbek joly: 1995-2000 jyldary – Sh.Aımanov atyndaǵy «Qazaqfılm» AQ-da akter, prodıýser. 2000-2002 jyldary – M.Gorkıı atyndaǵy balalar men jasóspirimder fılmder kınostýdııasy» dırektorynyń orynbasary. 2002-2006 jyldary – «Qazkınoprokat» ortalyǵynyń Bas dırektory. 2006-2007 jyldary – Almatydaǵy Respýblıka saraıy dırektorynyń orynbasary. 2007-2010 jyldary – «Jastar» saraıynyń dırektory (Astana).2010-2014 jyldary – Sh.Aımanov atyndaǵy «Qazaqfılm» AQ dırektorlar keńesiniń múshesi, táýelsiz dırektor, kınoprodıýser. 2009-2014 jyldary – «Báıterek» prodıýserlik ortalyǵynyń bas prodıýseri.2014-2015 jyldary – Sh.Aımanov atyndaǵy «Qazaqfılm» AQ birinshi vıtse-prezıdenti.2015-2016 jyldary – Alǵashqy ulttyq «Qazaq Eli» tarıhı serıalynyń bas prodıýseri. 2017-2019 jyldary – «Respýblıka saraıy» JShS dırektory, kınoprodıýser. 2019-2020 jyldary – «Qazaqfılm» kınostýdııasynyń dırektory. «10 jyl Astana» (2008), «Qazaqstan Respýblıkasynyń táýelsizdigine 20 jyl» (2011), «Qazaqstan Respýblıkasynyń Qarýly Kúshterine 20 jyl» (2011), «Qazaqstan Respýblıkasynyń táýelsizdigine 25 jyl» (2016), «177 OOSPN «Mýsýlmanskıı batalon» (2011), «Qazaqstan polıtsııasyna 25 jyl» (2017), «Qazaqstan Respýblıkasy quqyq qorǵaý áskerine 25 jyl» (2017), Baýyrjan Momyshuly atyndaǵy (2016) medaldarmen, I jáne II dárejeli «Qaısar» belgilerimen marapattalǵan.




47 jyl buryn (1974) «Nazarbaev Qorynyń» prezıdenti, Nazarbayev University qamqorshylyq keńesiniń múshesi Aslan Bákenuly SÁRІNJІPOV dúnıege kelgen.

Ekonomıka ǵylymdarynyń kandıdaty, joǵary bilimdi ákimshilendirý salasyndaǵy Pensılvanııa Ýnıversıtetiniń doktory (AQSh). Qazaq memlekettik ekonomıkalyq ýnıversıtetin, Oklahoma ýnıversıtetin (AQSh), Vena dıplomatııalyq akademııasyn támamdady. Sonymen qatar, Garvard ýnıversıteti Kennedı atyndaǵy memlekettik saıasat mektebinde taǵylymdamadan ótken.

1996 jyly eńbek jolyn Ortalyq Azııa memleketaralyq keńesi Atqarýshy komıtetiniń referenti bolyp bastady. 1997 jyly Qazaqstan Respýblıkasy Syrtqy ister mınıstrliginiń ortalyq apparatyna aýysty. 1998-2002 jyldary Qazaqstannyń AQSh-taǵy Elshiliginde ekonomıkalyq máseleler jónindegi attashe qyzmetin atqardy (Vashıngton). 2002-2007 jyldary Dúnıejúzilik banktiń Ortalyq Azııa boıynsha ınfraqurylymdardy, qarjylyq jáne jeke naryqtardy damytý departamentiniń jobalar úılestirýshisi. Sonymen qatar, Qazaqstan Respýblıkasy Bilim berýdi damytýdyń memlekettik baǵdarlamasyn ázirleýge qatysty. 2007-2009 jyldary QR Úkimetiniń jáne Ulttyq banktiń janyndaǵy «Ulttyq taldaý ortalyǵy» AQ Basqarmasy tóraǵasynyń orynbasary qyzmetin atqaryp, ekonomıkalyq damý, qarjy jáne bilim salalaryna jetekshilik jasady. 2009-2013 jyldary - «Nazarbaev ýnıversıteti» derbes bilim berý uıymy Atqarýshy keńesiniń tóraǵasy boldy. «Nazarbaev Ýnıversıteti» bilim mektebiniń qaýymdastyrylǵan professory. «Nazarbaev Ýnıversıteti» DBBU-nyń qurylǵanynan bastap qamqorshylyq keńesiniń múshesi.

Qazirgi qyzmetin 2016 jylǵy aqpannan beri atqaryp keledi.


Basty sózder: Kúntizbe,
Joǵary qaraı