Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

2019 jyly aýyl sharýashylyǵy ónimderiniń eksporty 3,3 mlrd dollar boldy

2020 jyldyń 28 aqpan 2020 12:54

NUR-SULTAN. QazAqparat – Súttiń shıkizat sektory óńdeý qajettiligin qamtı almaýda. Bul týraly QR Parlamenti Senatynyń depýtaty Dúısenǵazy Mýsın málim etti, dep habarlaıdy QazAqparat tilshisi.

«Aýyl sharýashylyǵy ónimderin óńdeý salasynda biz úlken óndiristik jáne eksporttyq rezervterge ıemiz. 2019 jyly eksport 3,3 mlrd AQSh dollaryna jetip, (2018 jylmen salystyrǵanda 5,9%-ǵa artqan), ımport kólemi 3,9 mlrd dollardy quraǵan (ósim 7%). Degenmen, Qazaqstan áli de ımportqa táýeldi, eksportymyz shıkizatqa baǵynyshty», - dedi depýtat Senatta agroónerkásiptik keshendi damytý taqyrybyna arnalǵan parlamenttik tyńdaýda.

Onyń sózine qaraǵanda, ótken jyly ishki tutynýdaǵy ımporttyń úlesi qus eti boıynsha 49 paıyzǵa, alma 31, irimshik pen súzbe 46, shujyq 39, qant 57, balyq 72 paıyzdy qurady.

«Óńdelgen ónim eksporty - asa ózekti másele. Et óńdeý kásiporyndary shıkizat jáne aınalym qarajatyna baılanysty 45 paıyzǵa júktelgen. Ony sheshý týraly túrli alańdarda alýan usynys, pikir aıtylǵanmen, byltyr shetelge tirideı satylǵan 156 myń bas iri qara, 263 myń qoı júıeli jumystyń joqtyǵyna dálel», - dedi D. Mýsın.

Onyń paıymynsha, bul problemalardyń boljamdy bolýy úshin jaýapty mınıstrlikterdiń úılestirilgen is-qımyly qajet.

«Qyrýar qarjylaı qoldaýǵa qaramastan, súttiń shıkizat sektory óńdeý qajettiligin qamtı almaýda. Derekterge súıensek, sońǵy 7 jylda 70 sút taýarly ferma iske qosylǵan. Alaıda jyl saıyn 52 myń tonnadan asa sút qyshqyldy ónimder men óńdelgen sút, 49 myń tonna irimshik, súzbe jáne qurǵaq sút ımporttalady. Sonymen qatar, ulttyq taǵamdyq azyqtar, baqsha daqyldary, jemis, kókónister óńdeýdiń ozyq tehnologııalary kerek. Jalpy, búkil óńdeý salasynyń ótkir máselesi - óńdeýshi kásiporyndardy sapaly shıkizatpen qamtýǵa basty nazar aýdarylýy qajet», - dedi senator.

Budan buryn habarlanǵandaı, Dúısenǵazy Mýsın aýyl sharýashylyǵynda sýbsıdııalaý erejeleriniń jıi ózgerýi salanyń damýyna keri áserin tıgizip jatqanyn aıtty.



Joǵary qaraı