Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

2025 jylǵa deıin qurylys salasyna shamamen 1 trln teńge ınvestıtsııa salynbaq

2022 jyldyń 14 mamyr 2022 17:29

NUR-SULTAN. QazAqparat – Aqtóbe oblysyna jumys sapary barysynda óndiris oryndaryn aralaǵan Premer-Mınıstr qurylys materıaldaryna degen suranystyń jyl saıyn artyp kele jatqanyn atap ótti. Osy oraıda, ınvestıtsııa kólemi de ulǵaıtylmaq, dep habarlaıdy QazAqparat Úkimettiń resmı saıtyna silteme jasap.

Premer-Mınıstr «Zerde Keramıka Aqtóbe» JShS-niń keramogranıt jáne qysh taqtasha óndiretin jańa zaýytynyń qyzmetimen tanysty. «Aqtóbe» ındýstrııalyq aımaǵy men Ónerkásipti damytý qory jelisi boıynsha memlekettik qoldaý alǵan kásiporyn óz ónimin ishki naryqqa da, eksportqa da jetkizedi.

Sondaı-aq, Úkimet basshysyna qýaty jylyna 650 myń tonna joǵary qospalanǵan bolat óndirýge jetetin balqytý zaýyty qurylysynyń jobasy tanystyryldy. Jobany iske asyrý búginde shamamen $1 mlrd kóleminde ımporttalatyn qurylys armatýrasyn otandyq ónimmen almastyrýǵa múmkindik beredi.

Premer-Mınıstr elimizde qurylys materıaldaryna degen suranystyń jyl saıyn artyp kele jatqanyn atap ótti. Osyǵan baılanysty Úkimet 2025 jylǵa deıin qurylys salasyna shamamen 1 trln teńge ınvestıtsııa salýdy josparlap otyr. Atap aıtqanda, 160-qa jýyq jańa jobany iske asyrý jáne 15 myńnan astam jumys ornyn qurý josparda bar.

Eske salsaq, QR Premer-Mınıstri Álıhan Smaıylov Aqtóbe oblysyna jumys sapary barysynda óńirdiń keshendi áleýmettik-ekonomıkalyq damýy jóninde keńes ótkizdi.

Birqatar mańyzdy ınfraqurylymdyq jáne óndiristik nysandardy aralady.

«Aqtóbe-Ulǵaısyn» avtojolyn qarjylandyrý tetikterin anyqtaýdy tapsyrdy.

Agroónerkásiptik keshendi damytý máseleleri týraly pikir almasty.

Joǵary qaraı