Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

6 mamyr. QazAqparat kúntizbesi

2021 jyldyń 6 mamyr 2021 07:00

NUR-SULTAN. QazAqparat - QazAqparat oqyrmandar nazaryna 2021 jylǵy 6 mamyrǵa arnalǵan kúntizbeni usynady.

ESTE QALAR OQIǴALAR

1992 jyly Qazaqstan Respýblıkasy men Danııa Koroldigi arasynda dıplomatııalyq qarym-qatynas ornatý týraly Hattamaǵa qol qoıyldy.

1993 jyly Almatyda Respýblıkalyq kıno úıinde 1991-1993 jyldary túsirilgen fılmderdiń baıqaýy ótti. Baıqaýdyń qorytyndysynda Gran-prı júldesi «Otyrardyń kúıreýi» (rejısseri A.Ámirqulov) jáne «Surjekeı» (rejısseri D.Manabaev) fılmderine berildi.

1998 jyly Qazaqstan Respýblıkasynyń astanasy - Aqmola qalasynyń ataýy Astana qalasy bolyp ózgerip, «Saryarqa» jáne «Almaty» aýdandary quryldy.

2003 jyly Astanada «Halyqtar dostyǵy» eskertkishi ashyldy. Avtory - Sáken Narynov.

2010 jyly Qazaqstan Respýblıkasy Syrtqy ister mınıstrliginiń ǵımaratynda Ekinshi dúnıejúzilik soǵys jyldarynda Germanııa jáne Avstrııa aýmaǵynda qaza tapqan qazaqstandyqtarǵa arnalǵan Estelik kitabynyń tusaýkeseri ótti.

2010 jyly Almaty qalasyndaǵy Dostyq dańǵylynda ornalasqan úıde sovet ofıtseri, Ekinshi dúnıejúzilik soǵys ardageri, «Halyq Qaharmany», Reıhstagqa tý tikken Raqymjan Qoshqarbaevqa arnalǵan memorıaldyq taqta saltanatty túrde ashyldy.

2013 jyly Bakýde Ázerbaıjan memlekettik akademııalyq opera jáne balet teatry Qazaqstannyń jetekshi kompozıtorlarynyń biri Erkeǵalı Rahmadıevtiń «Alpamys» operasynyń qoıylymyn usyndy.

2015 jyly Jeńistiń 70 jyldyǵyna arnalǵan úsh markadan quralǵan poshtalyq blok paıdalanýǵa engizildi. «Estelik jáne mereıtoılyq datalar» toptamasyndaǵy árbir markanyń nomınaly 200 teńgeni quraıdy. Poshta markalarynda Raqymjan Qoshqarbaev (Halyq Qaharmany), Mánshúk Mámetova (Keńes Odaǵynyń Batyry), Ivan Panfılov (Keńes Odaǵynyń Batyry) beınelengen.

2015 jyly Túrkııanyń Manısa provıntsııasynda «Mesır» halyqaralyq festıvalinde Túrkııa Respýblıkasyndaǵy Qazaqstan Respýblıkasynyń elshiligi men Manısa provıntsııasynyń mýnıtsıpalıteti uıymdastyrǵan Qazaqstan kúnderi ótti.

2017 jyly «Astana» halyqaralyq qarjy ortalyǵy (AHQO) janynan Quqyqtyq konsýltatsııalyq keńes quryldy. Keńes mindetine qarjy ortalyǵynyń jobalaryndaǵy aktilerdi qaraý jáne saraptaý, sondaı-aq, ózge de keńes berý qyzmetteri jatady. Sonymen qatar, Keńes quziretine Anglııa men Ýelstiń quqyqtyq qaǵıdalaryn negizge ala otyryp, quqyqtyq bazany qalyptastyrý jáne de álemdegi jetekshi qarjy ortalyqtarynyń standarttarymen jumys isteý de kiredi.

2019 jyly Sankt-Peterbýrgte Keńes Odaǵynyń batyry, qazaq halqynyń dańqty qyzy Álııa Moldaǵulovaǵa eskertkish ornatyldy. Eskertkish Sankt-Peterbýrgta Qyzyl gvardııa aýdanynda Qyzyl gvardııa kóshesindegi qala saıabaqtarynyń birinde ornalasqan. Bıiktigi 3 metrlik qoladan jasalǵan músin qyzǵylt granıtti tuǵyrǵa ornatylǵan. Oǵan batyr qyzdyń esimi men juldyzy oıylyp salynǵan. Tuǵyrdyń arǵy betinde onyń qaharmandyǵy týraly qysqasha málimet berilgen.

2019 jyly Lenıngrad oblysynyń Kıngısepp qalasynda kezinde Lenıngradtyń qorshaýyn buzyp bergen qazaqstandyq jaýyngerler rýhyna ornatylǵan granıt eskertkish saltanatty túrde ashyldy. Osy mańdaǵy urystardaǵy erekshe erligi úshin 314-shi atqyshtar dıvızııasyna kezinde «Kıngıseptik» degen at da qoıylǵan. Eskertkish túbine jasaq músheleri týǵan jerdiń bir ýys topyraǵy salynǵan kapsýlany da qosa kómdi. Ol kezinde osy dıvızııa sapyna áskerler attanǵan Pavlodardaǵy burynǵy temirjol vokzaly mańynan alynǵan.

2020 jyly «TV-Supren» brazılııalyq telearnasynda qazaq aqyny, ulttyq ádebıettiń negizin qalaýshy Abaıdyń 175 jyldyǵyn toılaý aıasynda alǵash ret portýgal tiline aýdarylǵan aqynnyń «Qara sózderi» kitabynyń prezentatsııasy ótti. Kitapty San-Paýlo Ýnıversıtetiniń professory, fılologııalyq ǵylymdar doktory Edelsıo Amerıko tárjimalady. Prezentatsııa barysynda Abaıdyń qazaq mádenıetiniń qalyptasýyndaǵy róli, tárbıe men ulttyq dúnıetanym problemalaryn kóterip, adamdardyń kemshilikterin synap, olardy eńbekke, aǵartýǵa, ǵylymǵa, zańdy buzbaýǵa shaqyrǵan, el birligi mańyzyn dáriptegen «Qara sózderiniń» mańyzy jaıly aıtyldy.


Basty sózder: Kúntizbe,
Joǵary qaraı