Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

75 baldan kem jınaǵan talapkerler doktorantýraǵa grantqa túse almaıdy

2021 jyldyń 16 maýsym 2021 16:15

NUR-SULTAN. QazAqparat - Doktorantýraǵa grantqa túsý úshin shekti ball 75 baldy quraıdy. Al, oqýǵa aqyly negizde túsý úshin shekti ball – 50, dep habarlaıdy QazAqparat.

Bul týraly búgin Bilim jáne ǵylym mınıstrliginiń Instagram paraqshasynda ótken tikeleı efır barysynda QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev málimdedi.

Onyń aıtýynsha, bıyl doktorantýraǵa ótinish qabyldaý 3 shildede bastalyp, 3 tamyzǵa deıin jalǵasady. Doktorantýraǵa túsý emtıhandary 4-20 tamyz aralyǵynda ótedi. Osy rette doktorantýraǵa túsý úshin bir ǵana joǵary oqý ornyn jáne bir bilim berý baǵdarlamalarynyń tobyn tańdaýǵa bolatynyn aıta ketken jón.

«Doktorantýraǵa túsý úshin ótinishter joǵary oqý oryndarynyń qabyldaý komıssııalary arqyly qabyldanady. Budan ári ótinishter Ulttyq testileý ortalyǵynyń aqparattyq júıesinde tirkeledi. Oqýǵa túsýshiler óńirlik testileý ortalyqtarynda túsý emtıhandaryn tapsyrady. Mádenıet jáne sport mınıstrligi men Densaýlyq saqtaý mınıstrligine vedomstvolyq baǵynysty joǵary oqý oryndaryna túsýshiler emtıhandardy óz joǵary oqý oryndarynyń bazasynda tapsyrady», – dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.

Túsý emtıhandarynyń kestesin QR BǴM Ulttyq testileý ortalyǵy ázirleıdi. Túsý emtıhandaryn ótkizý baǵdarlamalary men kestesi oqýǵa túsýshilerge emtıhan bastalǵanǵa deıin habarlanatyn bolady.

Esterińizge sala keteıik, bıyldan bastap doktorantýraǵa túsý emtıhany elektrondyq formatta ótedi. Úmitkerler kompıýterde esse jazady, doktorantýrada oqýǵa daıyndyq boıynsha test jáne bilim berý baǵdarlamasynyń beıini boıynsha emtıhandar tapsyrady.

«Qabyldaý emtıhandary testileý ortalyqtary bazasynda alǵash ret elektrondyq formatta ótedi. Bul format ótken jyly magıstratýraǵa qabyldaý kezinde aprobatsııadan ótken bolatyn. Degenmen, bul túsý emtıhandary tek testileý formatynda bolady degen sóz emes. Sonymen birge bolashaq doktoranttar joǵary oqý oryndary bekitetin taqyryptar boıynsha esse jazady. Esseni baǵalaý, doktorantýrada oqýǵa daıyndyq testi jáne beıindi emtıhandardyń nátıjeleri arqyly alynǵan baldar jınaqtalyp, qabyldaý emtıhanynyń qorytyndy baǵasy shyǵarylady», – dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.

Jalpy, oqýǵa túsý emtıhanynyń eń joǵary kórsetkishi - 100 ball.

Onyń ishinde esse – 20 ball, doktorantýrada oqýǵa daıyndyǵyn anyqtaýǵa arnalǵan test – 30 ball, beıindi emtıhan suraqtary – 50 ball. Jalpy emtıhanǵa 4 saǵat beriledi.

Doktorantýra boıynsha memlekettik bilim tapsyrysyna keletin bolsaq, 2021-2022 oqý jylyna PhD mamandaryn daıarlaýǵa arnalǵan memlekettik grant sany 1890 grantty quraıdy.

Doktorantýraǵa «magıstr» dárejesi jáne keminde toǵyz aı jumys ótili bar nemese medıtsınalyq mamandyqtar boıynsha rezıdentýrada oqýyn aıaqtaǵan tulǵalar qabyldanady.


Joǵary qaraı