8 tamyz kúni aýa raıy qubylmaly bolady

NUR-SULTAN. QazAqparat - 8 tamyz kúni elimizdiń basym bóliginde ońtústik tsıklonnyń áserinen turaqsyz aýa raıy saqtalady. Keı jerlerde jańbyr, batysta nóser jańbyr jaýady, dep habarlaıdy QazAqparat «Qazgıdromet» RMK baspasóz qyzmetine silteme jasap.

Naızaǵaı jarqyldap, daýyldy jel soǵady, burshaq jaýýy yqtımal. Respýblıkanyń keı jerlerinde jel kúsheıedi.

Qaraǵandy, Aqtóbe, Qostanaı, kúndiz Batys Qazaqstan oblystarynyń keı jerlerinde jel ekpini 15-20 m/s deıin kúsheıedi, daýyl turady, burshaq jaýýy yqtımal.

Jambyl, Túrkistan, Atyraý, kúndiz Aqmola, Soltústik Qazaqstan, Mańǵystaý, Qyzylorda oblystarynyń keı jerlerinde jel qarqyny - 15-20 m/s.

Kúndiz Almaty, Jambyl oblystarynda jáne Qaraǵandy oblysynyń ońtústiginde aptap ystyq saqtalady.

Atyraý, Aqtóbe, Qyzylorda, Túrkistan oblystarynyń basym bóliginde, Qaraǵandy, Almaty, Jambyl oblystarynyń keı jerlerinde tótenshe órt qaýpi saqtalady.