Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

A.Baıtursynulynyń 150 jyldyǵy: Aqmola oblysynda 2 myńnan astam shara ótkiziledi

2022 jyldyń 27 qańtar 2022 21:51

KÓKShETAÝ. QazAqparat - Aqmola oblysynda Alashtyń kórnekti qoǵam qaıratkeri, aǵartýshy-ǵalym, ult ustazy Ahmet Baıtursynulynyń týǵanyna 150 jyl tolýyna oraı brıfıng ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Brıfıngte Aqmola oblystyq ishki saıasat basqarmasynyń basshysy Altynaı Ámirenova, bilim basqarmasy basshysynyń orynbasary Botagóz Dúısenova, mádenıet, arhıvter jáne qujattamalar basqarmasynyń basshysy Aıgúl Sábıtova osynaý mereıtoı aıasynda bıylǵy jyly óńirde ótkizilgeli otyrǵan is-sharalar týraly baıandady.

«Ahmet Baıtursynuly - qazaq úshin qasıetti esim. Ol óz ultynyń baǵy úshin ómirdiń barlyq salasyna aralasty. Buǵan onyń ataq-dańqy dálel. Qazaq halqy birtýar perzentin qoǵam jáne memleket qaıratkeri, aqyn, ádebıet zertteýshi ǵalym, túrkitanýshy, pýblıtsıst, pedagog, aýdarmashy, ulttyq jazýdyń reformatory retinde jaqsy biledi», - dep atap ótti ishki saıasat basqarmasynyń basshysy Altynaı Ámirenova.

Basqarma basshysynyń aıtýynsha Aqmola oblysynda 22 kóshe, 1 mektep Ahmet Baıtursynulynyń esimimen atalady. Bıyl Kókshetaý qalasyndaǵy joǵarǵy tehnıkalyq kolledjine, Birjan sal, Jaqsy aýdandarynyń orta mektepterine jáne aýdan ortalyqtaryndaǵy, aýyldardaǵy kóshelerge Ahmet Baıtursynulynyń esimi beriledi.

Sh.Ýálıhanov atyndaǵy Kókshetaý ýnıversıtetimen birlesip, Ahmet Baıtursynulynyń 150 jyldyq mereıtoıyna arnalǵan halyqaralyq konferentsııa uıymdastyrý josparlanǵan.

Mereıtoı bilim jáne mádenıet mekemelerinde keńinen atalyp ótiledi.

Mádenıet basqarmasynyń basshysy Aıgúl Sábıtova oblystyń mádenıet oshaqtarynda «Ulttyń uly ustazy» aımaqaralyq aqyndar aıtysy, «Alashtyń ardaǵy» ádebı - tarıhı kesh, «Baıtursynuly jazýy» balalarǵa arnalǵan shoý-baǵdarlama, «Ómir joly» óleńder baıqaýy, Ahmet Baıtursynulynyń eńbekteri boıynsha konferentsııalar, dárister, semınarlar, kórmeler, debattyq týrnırler, chellendjder, flesh-mobtar jáne kóptegen túrli formattaǵy is sharalar ótkiziletini týraly baıandady.

Bilim mekemelerinde Ahmet Baıtursynulynyń eńbekteri boıynsha dárister, kórmeler, debattyq týrnırler, tanymdyq-aqparattyq sharalar, chellendjder uıymdastyrylady.

«Oblystyń 552 mektebi men 32 kolledjinde búginnen bastap ǵalym men qoǵam qaıratkeriniń týǵan kúnine arnalǵan «Ahmet taǵylymy» atty onkúndik bastaldy. Ǵalymnyń ǵylymı murasyn jan-jaqty nasıhattaý maqsatynda barlyq bilim berý uıymdarynda Ahmet Baıtursynovqa arnalǵan buryshtar ashylyp otyrady», - dep atap ótti Botagóz Dúısenova.

Aıta keteıik, óńirde mereıtoıǵa arnalǵan eki myńnan astam shara ótkizý josparlanýda.


Avtor Aslan Ospanov
Basty sózder: Mádenıet, Aımaq, Aqmola oblysy,
Joǵary qaraı