Aýa raıy
Astana -20 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

ÁMEN anımatsııalyq fılmder festıvaline túrki elderi qatysady

2020 jyldyń 26 qazan 2020 20:36

NUR-SULTAN. QazAqparat – 30-31 qazan kúnderi ÁMEN anımatsııalyq fılmder kınofestıvali onlaın formatta ótedi, dep habarlaıdy QazAqparat tilshisi.

Ótken jyly festıval qorjynyna 80-nen astam ótinim túsip, baıqaýǵa 51 jumys iriktep alynǵan edi. Nátıjesinde 7 jeńimpaz anyqtalyp, 5 joba arnaıy júldemen marapattaldy.

«Bıylǵy ekinshi festıval onlaın formatta ótedi. Bul baıqaýdyń ereksheligi – óner dodasynyń halyqaralyq deńgeıge kóterilýi, sharaǵa túrki elderiniń, atap aıtqanda, Túrkııa, Ázerbaıjan, Túrikmenstan, Ózbekstan, Qyrǵyzstan, Tatarstan jáne Bashqurtstan ókilderi de qatysady. Bul joly festıvalge 40-tan asa jumys usynyldy», - deıdi uıymdastyrýshylar.


Baıqaýda 2019-2020 jyldary túsirilgen anımatsııalyq fılmder, stýdenttik anımatsııalyq jumystar jáne komıkster synǵa túsedi. Oǵan ótinim bildirgen barlyq sýretshi-mýltıplıkatorlar qatysa alady.

Shara aıasynda «Rýhanı jańǵyrý» qazaqstandyq qoǵamdyq damý ınstıtýtynyń qatysýymen «Qazaq anımatsııasynyń kókeıkesti máseleleri» jáne «Túrkitildes elderdiń anımatsııalyq kınoóneriniń búgini men erteńi» taqyrybynda dóńgelek ústelder jáne «Qazaqstan: tabıǵat jáne adam» atty komıkster kórmesi uıymdastyrylady. Sondaı-aq, Ulttyq kınony qoldaý memlekettik ortalyǵynyń atsalysýymen otandyq jáne sheteldik ozyq mýltıplıkatorlardyń master-klastary men trenıngteri ótedi.

Aıta keterligi, Ulttyq kınony qoldaý ortalyǵy – Qazaqstanda zamanaýı kınonaryq qalyptastyryp, onyń básekege qabilettiligin arttyrýmen, kıno salasyna ınvestıtsııa tartýmen jáne ulttyq fılmderdiń kınoprokaty qyzmetin júzege asyrýmen aınalysatyn birden-bir uıym.

Budan bólek, «Qazaqfılm» kınostýdııasynyń qoldaýymen qazaq anımatsııalyq fılmderi retrospektıvasy, ıaǵnı 1960-2020 jyldar aralyǵynda jaryq kórgen «Qarlyǵashtyń quıryǵy nege aıyr?», «Qańbaq shal», «Joshy han», «Tolaǵaı», «Muzbalaq» syndy 30-dan asa mýltfılm kórsetiledi.

Shara barysynda Qazaqstan jáne Túrkııa memleketteriniń tolyqmetrli fılmderi de kórsetiledi. Aıryqsha atap óterligi, rejısser Qasıet Saqıollanyń «Mahambet» mýltfılmi tuńǵysh ret halyqaralyq deńgeıde kópshilik nazaryna usynylmaq.

Kınofestıval Youtube jáne Facebook jelisindegi resmı paraqshalarda kórsetiledi.

Kınofestıval uıymdastyrýshylary – «OzgeEpic» zamanaýı óner keńistigi men Qazaqstan anımatsııalyq kınostýdııalar qaýymdastyǵy.





Avtor Aıjan Serikjanqyzy
Basty sózder: Túrki elderi, Mádenıet,
Joǵary qaraı