Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Ádilet mınıstri: Statı isi ózgelerge mańyzdy sıgnal boldy

2021 jyldyń 29 jeltoqsan 2021 13:42

NUR-SULTAN. QazAqparat – QR Ádilet mınıstri Marat Beketaev Statı isine qatysty pikir bildirdi, dep habarlaıdy QazAqparat tilshisi.

«Ádilet mınıstrligi bıznesmen Statımen aradaǵy teketireste Qazaqstannyń jeńiske jetkenin málimdedi. Sonda da halyq kókeıinde suraq bar. Qazaqstan Statı talap etip otyrǵan 500 mln dollardan astam qarajatty tóleı me?», - dep surady BAQ ókili.

«Munyń jaýaby qarapaıym. Qazaqstan Statı talap etip otyrǵan aqshany tólemeıdi», - dep qysqa qaıyrdy vedomstvo basshysy ortalyq kommýnıkatsııalar qyzmetinde ótken brıfıngide.

Sondaı-aq, ol Qazaqstan tarabynyń Statıden sot shyǵyndary úshin qansha qarajat talap ete alatyny týraly túsinikteme berdi.

«Bul shyǵyndardy túrli jolmen esepteýge bolady. Zańgerlerge jumsalǵan tikeleı shyǵyndy birinshi blokqa jatqyzýǵa bolady. Ekinshi blok – repýtatsııalyq shyǵyndar. Úshinshisi – QR Ulttyq banki osy is boıynsha buǵattalǵan qorlardyń shotynan shekteý qoıylǵan kezde ıgerilmegen yqtımal tabystardy talap ete alady», - dedi Marat Beketaev.

Onyń aıtýynsha, Statı isine ketken shyǵyndy tolyq qaıtarýdan da mańyzdy másele bar.

«Bul jerde shyǵyn somasyn maksımaldy mólsherde qaıtarý eń mańyzdy mindet emes deýge bolady. Statıdiń ózi Moldovııada turatyny málim. Onyń negizgi shottary basqa da sot protsesteri boıynsha buǵattalǵan. Onymen istes bolǵan kredıtorlar óte kóp. Onyń qylmystyq áreketi bir jyl ǵana júrip jatqan joq. Statıge qarsy is júrgizip jatqan Qazaqstan ǵana emes. Keleshekke úńilsek, tolyq somany óndirip alý múmkin bolmaıtyn da shyǵar. Bul jerde Qazaqstannyń osyndaı alaıaqtardy anyqtaýǵa, osyndaı agressıvti áreketterge qarsy turýǵa qajetti resýrstary bar ekenin dáleldeý mańyzdy», - dedi ol ortalyq kommýnıkatsııalar qyzmetinde ótken brıfıngide.

Aıtýynsha, osyndaı isterdegi tabandylyǵy arqyly Qazaqstan ózgelerge mańyzdy sıgnal berip otyr.

«Halyqaralyq qorlar men ınvestıtsııa naryǵynyń negizgi oıynshylary osy sıgnal arqyly Qazaqstannyń quqyqtyq júıe retinde damyp kele jatqanyn túsinetin bolady. Tıisinshe, Qazaqstanǵa ınvestıtsııa salýǵa bolady jáne salý qajet ekenine kóz jetkizedi», - dedi Ádilet mınıstri.


Joǵary qaraı