Aýa raıy
Astana 19 °S
Almaty 17 °S
valıýta baǵamy
USD 385.42
EUR 424.58
RUB 6.00
CNY 54.31

Aıda Balaeva: Kez kelgen máseleni keshendi túrde sheshý kerek

2019 jyldyń 19 tamyz 2019 09:23

NUR-SULTAN. QazAqparat - Qazaqstan Respýblıkasy Prezıdentiniń kómekshisi – Qazaqstan Respýblıkasy Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi Aıda Ǵalymqyzy Balaeva Qaraǵandydaǵy Nur Otan partııasynyń ǵımaratynda azamattardy jeke máseleleri boıynsha qabyldady, dep habarlaıdy QazAqparat tilshisi «Egemen Qazaqstan» gazetine silteme jasap.

Prezıdent kómekshisimen kezdesip, ózderin mazalap júrgen máselelerdi kózbe-kóz aıtyp, sonymen qatar memleket basshysyna ótinish-tilekterin tikeleı jetkizýdi nıet bildirgen oblys turǵyndarynyń qarasy mol boldy. Aıta ketetin bir jaıt, Aıda Balaeva hanymnyń aldyna kelip, aryzyn aıtqan azamattardyń basym kópshiligin baspana máselesi tolǵandyratyn bolyp shyqty.

Biri uzaq jyldardan beri kezekte tursa da, arman qylǵan qaıran páterge qol jetkize almaı kele jatsa, endi biri eńbekaqysynyń azdyǵynan ıpotekalyq nesıeniń alǵashqy jarnasyn tóleı almaı pushaıman bolyp júr eken.

Temirtaý qalasynyń turǵyny Sholpan Ábilova, Qaraǵandyda turatyn Álııa Rymbaeva, Juldyz Dostaeva, Aıtbala Álimbaeva, Rakesh Hasenova jáne basqa da azamattardyń baspana muqtajdyǵy týraly kózdiń jasyn tógip aıtqan ótinishterin muqııat tyńdaǵan Aıda Ǵalymqyzy qamkóńil jandardy sabyrǵa shaqyrdy.

«Men sizderdiń problemalaryńyzdy jaqsy túsinem. Degenmen, dál osy jerde otyryp sizderge kómektesem dep qurǵaq ýáde bergim kelmeıdi. Nege deseńizder, jyldar boıy páter kezeginde turǵandardy, kópbalaly jáne az qamtylǵan otbasylardy ysyryp tastap, olardyń quqyǵyn taptaýǵa bolmaıdy. Sondyqtan, sizder qazir elimiz boıynsha iske asyryla bastaǵan «Baqytty otbasy», «Nurly jer» sııaqty memlekettik baǵdarlamalarǵa qatysýlaryńyz kerek. Bul tarapta sizderge zań aıasynda múmkin bolǵan kómektiń bári kórsetiledi. Sizder kótergen máselelerdi hattamaǵa tirketip, tıisti oryndar aldyna árqaısysy boıynsha naqty mindetter qoıylatyn bolady», - dedi Aıda Balaeva.

Prezıdent kómekshisimen kezdesýge múmkindigi shekteýli jandar, asyraýynda múgedek nemese aýyr dertke shaldyqqan balalary bar analar da kóptep keldi. Temirtaý qalasynyń turǵyny Jánibek Baıtokov múgedek jandarǵa qatysty sheshimin tappaı kele jatqan kóptegen máseleni qozǵady. Máselen, ol arbaǵa tanylǵan múgedek jan shıpajaı-kýrorttyq emge barǵanda ony alyp júretin adamǵa aqsha tólenbeıtinin ashyna aıtty. Al Qaraǵandy turǵyndary Aıman Dúskenova arbashadaǵy múgedek balasyn, Samal Mánjibaeva tserebraldy sal aýrýyna shaldyqqan balasyn emdeýge materıaldyq kómek surady.

Aıta ketý kerek, azamattardy qabyldaý barysynda týyndaǵan suraqtar, kóterilgen máseleler boıynsha tıisti memlekettik organdardyń qyzmetkerleri ótinish ıelerine qolma-qol jaýap berip nemese zańdyq turǵydaǵy qajetti aqyl-keńes kómegin kórsetip otyrdy. Bul rette qala ákimi Nurlan Áýbákirovtiń suraqtyń basym kópshiligi baspana máselesine tirelgendikten, áńgimege jıi aralasýyna týra keldi. Tipti, Aıda Ǵalymqyzynyń ózi qala basshysynyń túrli suraqtarǵa, ár máselege qatysty bergen saýatty, naqty jáne zańǵa súıengen jaýaptaryna súısinip, «Óz mindetin óte joǵary deńgeıde meńgergen ákim» degen baǵa berdi.

Prezıdent kómekshisiniń aldyna kelip muń aqtarǵan jandardyń ishinde medıtsınalyq qyzmettiń sapasyna, dárigerlerdiń biliktiligine, dári-dármekpen qamtamasyz etilýdegi kemshilikterge syn aıtqandary da kóp boldy. Osy rette Aıda Ǵalymqyzy oblystyq densaýlyq saqtaý basqarmasyna medıtsınalyq mekemelerdegi qyzmetkerlerdi attestatsııadan ótkizip, medıtsınalyq qamtamasyz etý boıynsha tolyqtaı saraptama jasaý kerektigin tapsyrdy.

Aıda Balaevanyń qabyldaýyna kelgen jandardyń arasynda ataýly áleýmettik kómekti qaıtsem alam, ol qandaı jaǵdaıda beriledi degen sııaqty qarapaıym suraqtardy qoıǵandary da boldy. Buǵan jaýap bere otyryp, Prezıdent kómekshisi turǵyndar arasynda osy baǵyt boıynsha túsinik jumystarynyń keńinen júrgizilýi kerektigin aıtty. «Nur Otan partııasynyń fılıaly, oblystyq, qalalyq qoǵamdyq keńester bul baǵytta qoǵamdyq qabyldaýlar, dóńgelek ústelder uıymdastyryp, halyqty áleýmettik salada bolyp jatqan oń ózgeristermen tanystyryp otyrýy qajet», dep atap ótti Aıda Ǵalymqyzy.

Qabyldaýǵa sońǵylardyń biri bolyp kirgen jergilikti «Arqa aqshamy» gazetiniń bas redaktory Janat Jańqashuly óziniń týyp-ósken Saryobaly aýylynda sý máselesiniń ótkir turǵanyn, uıaly telefon baılanysynyń joqtyǵyn jetkizdi. Sonymen qatar, ol qazirgi ýaqytta qazaq baspasóziniń qıyn jaǵdaıdy bastan keship jatqanyn aıtyp qynjylys bildirdi. «Eger, jarnamanyń qazaq tilinde berilýi mindettelse, onda ana tilinde shyǵatyn gazetter óz kúnin ózi kóre alatyn dárejege jeter edi», - dedi ol.

Azamattardy qabyldaý rásiminiń aıaǵyna taman Aıda Balaeva osy kezdesý barysynda turǵyndardyń jeke máselesi, olar kótergen problemalardyń barlyǵy jiti nazarda bolatynyna taǵy da ýáde berdi. Tańerteńgi saǵat 10.00-den keshki 18.00-ge deıingi aralyqta Aıda Balaeva ótkizgen qabyldaýda 100-den asa adam boldy.

«Negizi, qandaı da bir máseleni jeke alyp qaraǵannan góri ony keshendi túrde sheshýge umtylǵanda ǵana is oń nátıje beredi. El de bizdiń jumysymyzdy osyndaı ıgi qadamdar arqyly baǵalaıdy», - dep túıindedi sózin Aıda Balaeva hanym qabyldaýǵa qatysqan laýazymdy tulǵalar men memlekettik organdar qyzmetkerlerine qarata.

***

Jumys saparynyń ekinshi kúni Aıda Balaeva Qaraǵandy oblysynyń ǵylymı jáne shyǵarmashyl zııaly qaýym ókilderimen, sonan keıin jastarmen kezdesip, emen-jarqyn áńgime qurdy. Qaraǵandy ekonomıkalyq ýnıversıtetinde ótken kezdesýge jergilikti JOO oqytýshy ǵalymdary, teatr ártisteri, BAQ ókilderi, jazýshylar qatysty. Kezdesýdi ashqan Aıda Balaeva Qaraǵandy qalasyna kelgen jumys sapary jaıynda, keshegi kúni tuǵyndardy qabyldaý kezinde alǵan áseri men túıgen oılary týraly qysqa da nusqa aıtyp berdi. Sondaı-aq, osy kezdesýden ne kútetinin de jetkizdi.

«Sizder jurtpen etene aralasyp júresizder, eldiń muńy men tilegin jaqsy bilesizder. Sondyqtan, búgingi beıresmı jaǵdaıdaǵy kezdesýde sizderdiń júıelik sıpattaǵy usynystaryńyz ben ótinish-tilekterińizdi tyńdaǵym keledi», - dedi Aıda Balaeva.

Atalǵan basqosýda alǵashqylardyń biri bolyp sóz alǵan S.Seıfýllın atyndaǵy qazaq drama teatrynyń ártisi, Qazaqstannyń eńbek sińirgen qaıratkeri Qaırat Kemalov óner salasyndaǵy birshama máseleler týraly aıtyp ótti. Teatr jáne kıno akteri búgingi kúnde osy salada kadr máselesiniń óte ótkir turǵanyn tilge tıek etti.

«Qyzmettik baspana bolmaǵan soń, teatrǵa jastar kele bermeıdi. Bizdegi eń úlken máseleniń biri osy», - dedi Q.Kemalov.

Oblystyq «Ortalyq Qazaqstan» gazeti bas redaktorynyń birinshi orynbasary Ersin Musabekov jýrnalıster mártebesi týraly máseleni kóterdi.

«BAQ ókilderi ne bıýdjettik, ıa bolmasa memlekettik qyzmetke jatpaıdy. Mártebesi bolmaǵan soń, kóp jaǵdaıda esesi ketip júredi. Máselen, jas jýrnalıster ıpotekalyq nesıe alaıyn dese, mártebesi bolmaǵan soń túrli memlekettik baǵdarlamalarǵa qatysa almaıdy», - dedi ol.

Sonymen qatar, jergilikti joǵary oqý oryndarynyń oqytýshy-ǵalymdary osy saladaǵy kún tártibinde ótkir turǵan máseleler jaıyn qozǵady. Ásirese, olar jaǵdaıy jasalmaǵandyqtan jas ǵalymdardyń shetelge ketý úderisiniń údep bara jatqanyna qynjylatyndyqtaryn jetkizdi. «Bolashaq» akademııasynyń kafedra meńgerýshisi Aqylbek Qabjanov jaǵdaı osylaı jalǵasa beretin bolsa, tipti jastary 50-den asqan ǵalymdardyń ózi shet memleketterge kóship ketýi ábden múmkin degen kúdik aıtty.

«Jas ǵalymdarǵa kóńil bólmeıinshe, bizdiń ǵylymnyń bolashaǵy bulyńǵyr bolmaq. Sodan keıin aıtpaǵym, jekemenshik joǵary oqý oryndaryn reti kelsin-kelmesin teksere berýge tyıym salynsa eken. Olardy qoldaýdyń ornyna, tuqyrta bergennen túk te ónbeıdi», - dedi oqytýshy ǵalym.

Sondaı-aq, kezdesýde «Serpin» baǵdarlamasy boıynsha oqıtyn stýdentter sanynyń artýy jataqhanada oryn jetispeýshilik máselesiniń týyndaýyna ákep soqqany aıtyldy. Serpindikterdi oqý bitirgen soń mindetti túrde jumysqa ornalastyrý da JOO-larǵa aýyr tıip jatqan kórinedi. Osy jaıyndaǵy maǵlumattarǵa qanyqqan Aıda Ǵalymqyzy «Serpin» baǵdarlamasynyń tuǵyrnamasyn búgingi kún talaby turǵysynan qaıyra bir tarazylaýdyń ýaqyty jetkenin aıtty.

Kezdesýdiń sońyna taman Aıda Balaeva oqytýshylardyń jas urpaqty tárbıeleý isindegi róliniń asa mańyzdy ekendigine nazar aýdardy.

«Búgingi jastarymyz bilimdi, mádenıetti jáne rýhanı turǵyda óte baı bolýlary kerek. Jastar oqý-bilimge tartylmasa, jumyspen qamtylmasa, qoǵamdaǵy óz ornyn tappasa, onda mindetti túrde psıhologııalyq daǵdarysqa dýshar bolady. Ásirese, aýyldyq jerlerden qalaǵa kelgen jastar qoǵamdyq ómirde áleýmettik turǵyda beıimdele almaı, ókinishti jaıttarǵa urynyp jatady. Sizder men bizdiń mindet – mundaı rýhanı quldyraýdyń aldyn alý», - dedi Aıda Ǵalymqyzy.

Budan keıin Aıda Balaeva Qaraǵandy qalasyndaǵy Gogol atyndaǵy oblystyq ǵylymı-ámbebap kitaphanasynda úkimettik emes uıymdardyń ókilderimen jáne oblystyń belsendi jastarymen kezdesip, olardyń usynys-tilekterin tyńdady.

Kezdesýde Qarqaralydaǵy M.Ádekenov atyndaǵy kolledjdiń stýdenti Dáýren Rahymbek keler jylǵy «Volonterler jylynda» eriktilerge memleket tarapynan kóńil bólinse degen tilek aıtty. Bul taqyrypty ilip áketken oblystyq jastar resýrsy ortalyǵynyń qyzmetkeri Qýandyq Mereı osy jyly volonterlerge bólinetin stıpendııalar JOO stýdentterine ǵana emes, kolledj jáne mektep oqýshylaryna da berilse degen pikir bildirdi. Sondaı-aq, belsendi jastardyń biri, dástúrli ánshi Merýert Bashaı atamekenge oralǵan qandastarymyzdyń kúndelikti ómirde kezdesetin problemalary týraly áńgime qozǵady. Úkimettik emes uıymdardyń ókilderi ózderine memleket tarapynan qoldaý kórsetilgenin qalaıtyndyqtaryn jetkizdi.

Jastardyń osy jáne basqa da usynys-tilekterin zer salyp tyńdaǵan Aıda Balaeva bul aıtylǵan máselelerdiń qolyna jazbasha túrde tıgennen keıin mindetti túrde saraptan ótkizilip, qaperge alynatynyna ýáde berdi.

Joǵary qaraı