Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqmola oblysynda taýarly-sút fermasy salynyp jatyr

2021 jyldyń 10 maýsym 2021 05:24

KÓKShETAÝ. QazAqparat - Aqkól aýdanynyń Dombyraly aýylynda taýarly-sút fermasy salynyp jatyr. «Aqkól Agro» seriktestiginiń bas dırektory Mádı Esqaraev 300 bas saýyn sıyrǵa arnalǵan nysan aǵymdaǵy jyldyń tórtinshi toqsanynda paıdalanýǵa beriletinin málim etti, dep habarlaıdy QazAqparat tilshisi Aqmola oblystyq ishki saıasat basqarmasynyń baspasóz qyzmetine silteme jasap.

Bıylǵy jyl belgisimen ótip jatqan el Táýelsizdiginiń 30 jyldyǵy – bul Aqmola oblysy ómiriniń túrli salalaryndaǵy jetistikterdi belgileýge múmkindik. Aqmolalyqtardyń jasampaz eńbegi-bul búkil óńirdiń damýy. Oblystyń ózi astyq qoımasy jáne el naryǵyndaǵy et – sút ónimderiniń negizgi jetkizýshisi bolyp tabylady.

«Biz Býrabaı aýdanynda sımmental tuqymdy 40 bas sıyr satyp aldyq. Qazir Germanııadan asyl tuqymdy saýyn sıyrlaryn, sondaı-aq jabdyqtardy ákelý úshin jumys istep jatyrmyz. Memleket tarapynan sýbsıdııa jáne jeńildetilgen salyq qoldaýy bar. Ferma iske qosylǵannan keıin jylyna 500 tonna tabıǵı sút óndiretin bolamyz, shıkizatty Nur-Sultan, Kókshetaý, Pavlodar sút zaýyttaryna ótkizemiz. Búgingi tańda 20 jumys orny ashyldy», - deıdi kásiporyn basshysy.

Tselınograd aýdanynda «Sıvka-Býrka» sharýa qojalyǵy 2015 jyldan bastap jumys isteıdi. Bes jyl buryn «Qulan» baǵdarlamasy boıynsha birneshe bas jylqy satyp alýǵa nesıe aldyq. Sharýashylyq basshysy Igilik Tálkenov «Sybaǵa» baǵdarlamasy arqyly 138 bas saýyn sıyr, alty buqa gereford satyp alǵanyn aıtty. Búginde mal basy 400 basty quraıdy.

«Ótken jyly mal soıý pýnkti salyndy, aldaǵy ýaqytta et óńdeýge kirisýdi josparlap otyrmyz. Kelesi jyly jemshóp daqyldaryn egýdi bastaımyz. Mal basy bolashaqta myńǵa jetkizý josparda bar. Memleket sýbsıdııamen kómektesedi», - deıdi Igilik Tálkenov.

«Aıdar» sharýa qojalyǵy Ereımentaý aýdany Novomarkovka aýylynyń mańynda ornalasqan. Bıyl egistik alqaby 400 gektardan 600 gektarǵa deıin ulǵaıtyldy, 300 gektar júgeri, 150 gektarǵa sýdan shóbi, 150 gektarǵa jońyshqa egildi. «Jańa bereke» JShS bordaqylaý alańyndaǵy úsh myń bas iri qaraǵa malǵa jem-azyq daıyndaýda. Al, osy aýyldaǵy «Novomarkovka Agro-2010» JShS dırektory Serik Іzbasarov bıyl 12 myń gektar jerge dándi daqyldar egilgenin, úsh myń gektar jer jyrtylǵanyn aıtýda.

«Ótken jyly biz dándi daqyldardy tazalaý jáne keptirý boıynsha jabdyq ornattyq. Astyq qoımasy jóndeldi. Sýbsıdııa túrinde qoldaý kórsetkeni úshin memleketke alǵysymyz sheksiz», - deıdi seriktestik dırektory.

Aıta keteıik, Aqmola oblysy elimizdiń agrarly óńirleriniń biri sanalady. Bıyl oblys dıqandary alǵashqylardyń biri bolyp tuqym sebý jumystaryn aıaqtady.


Joǵary qaraı