Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqmola oblysynyń orta mektebindegi oqý protsesi onlaın rejımde baqylaýda

2021 jyldyń 13 qyrkúıek 2021 16:02

AQMOLA OBLYSY. QazAqparat - Aqmola oblysynyń P.Isakov atyndaǵy №1 orta mektebindegi oqý protsesi onlaın rejımde baqylanady. Mekteptiń barlyq perımetri boıynsha jáne oǵan irgeles aýmaqta 27 beınebaqylaý kamerasy ornatylǵan, dep habarlaıdy QazAqparat.

Mektep basshylyǵy atap ótkendeı, eń aldymen bul shara balalardyń qaýipsizdigin qamtamasyz etýge baǵyttalǵan. Sonymen qatar mektepte qaýipsizdik jáne oqý ornyna kirý úrdisin baqylaý júıesi ornatylǵan. Oǵan qosa adamnyń bet-álpetin taný qurylǵylary, týrnıketter jáne habarlandyrý júıesi bar.

«Mekteptiń oqý kabınetteri beınebaqylaý kameralarymen, sonymen birge qozǵalys, esiktiń tuıyqtalýy men tútin paıda bolǵanda habardar etetin arnaıy qurylǵylarmen jabdyqtalǵan», - delingen QR Bilim jáne ǵylym mınıstrligi baspasóz qyzmeti málimetinde.

Mektepte sondaı-aq órtke qarsy datchıkter men atmosferalyq aýa sapasyn baqylaıtyn qural-jabdyqtar ornatylǵan. Qaýipsizdik júıelerinen barlyq aqparat tikeleı qaladaǵy ahýaldyq ortalyqqa túsedi.

«Mundaı tehnologııalar oqýshylardyń qaýipsizdik deńgeıin aıtarlyqtaı arttyrýǵa múmkindik berdi. Oqýshylar mektepke elektrondyq smart-kartalar arqyly kirip, shyǵady. Bul oqýshylardyń sabaqqa qatysýy barysynda elektrondyq esep júrgizýge múmkindik beredi, al ata-analar óz balalaryn baqylaı alady. Ata-analar balanyń mektepke kelýi jáne ketýi týraly Telegram messendjeriniń kómegimen habardar etiledi», — dep atap ótti P.Isakov atyndaǵy №1 Aqkól orta mektebiniń dırektory Ásel Sadyqova.

Bilim ordasyndaǵy taǵy bir jańashyldyq – elektrondyq kitaphananyń engizilýi. Qyzmetterdi avtomattandyrý kitaphana qoryn esepke alýdy jeńildetti. Elektrondyq katalog jasalyp, oqyrmandarǵa qyzmet kórsetý ýaqyty qysqartyldy. Muǵalimder men oqýshylar smart-kartalardy paıdalanady. Bul mektep oqýshylary arasynda eń tanymal bolyp sanalatyn ádebıetter boıynsha monıtorıng júrgizýge múmkindik beredi.

Bilim berý uıymyn damytý baǵdarlamasy aıasynda mekteptiń materıaldyq-tehnıkalyq bazasy da jetildirildi. Bıýdjet qarajaty esebinen 170 birlik kompıýterlik tehnıka men joǵary jyldamdyqty modemder satyp alyndy. Sonymen qatar ótken oqý jylynda bıologııa, robototehnıka kabınetteri zamanaýı jabdyqtarmen qamtylǵan. Sport zaly úshin mektep basshylyǵy 260 birlik sporttyq qural-jabdyq satyp alǵan.

P. Isakov atyndaǵy №1 Aqkól orta mektebi kóptildilik oqytý boıynsha pılottyq jobaǵa qatysyp jatyr. Mektep bazasynda shaǵyn jınaqty oqý oryndary úshin resýrstyq ortalyq qurylyp, jumys isteıdi. Aqkól mektebi jas ekologtardyń eriktiler qozǵalysyn damytý boıynsha da tirek mektep bolyp otyr.

Bilim berý sapasy týraly aıtatyn bolsaq, mektep oqýshylary — oblystyq, respýblıkalyq zııatkerlik baıqaýlar men olımpıadalarda júldeli oryn ıegerleri. Sondaı-aq oqý orny «aýdandaǵy oqýǵa qushtar mektep» ataǵyna ıe.

Mektep muǵalimderi balalardyń ekologııalyq bilim alýyna erekshe nazar aýdarady. Mekteptegi «Jasyl planeta» ekologııalyq murajaıy aımaqtaǵy eń úzdik dep tanylsa, al mektep oqýshylary Aqmola oblysynyń úzdik ekoblogerleri atanǵan.


Avtor Rýslan Ǵabbasov
Basty sózder: Aqmola oblysy, Bilim, Internet,
Joǵary qaraı