Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqmolada mototsıkl tizgindegen 48 jastaǵy júrgizýshi mert boldy

2021 jyldyń 23 shilde 2021 23:56

KÓKShETAÝ. QazAqparat - Aqmola oblysynyń Býrabaı aýdanynda «Aqylbaı-Qyzylaǵash» avtojolynyń 11-shaqyrymynda Kókshetaý qalasynyń 48 jastaǵy turǵyny jol apatynan qaza tapty, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, oqıǵa Qyzylaǵash aýylynyń mańynda bolǵan.

«Reıser» mototsıklin tizgindegen turǵyn rólge ıe bola almaı, qatty jyldamdyqpen joldyń shetine ushyp ketken.

Sol jerde mototsıkl aýdarylyp, 48 jastaǵy júrgizýshi oqıǵa ornynda mert boldy.

Qazirgi ýaqytta atalǵan fakti boıynsha sot-medıtsınalyq saraptama taǵaıyndalǵan. QR QK 345-babynyń 3-bóligi boıynsha sotqa deıingi tergeý júrip jatyr.

Tártip saqshylary mototsıklısterge arnaıy qorǵanys quraldaryn qoldaný, óte muqııat bolý, belgilengen jyldamdyq rejımin, jol júrý kezektiligin saqtaý jáne jolda kúrt manevr jasaýdan aýlaq bolý qajettigin eskertedi.

Aqmola polıtseıleri motokólik ushyraıtyn jol apatynyń negizgi sebepterin aıtty.

Olar - jyldamdyq rejıminiń artýy, mototsıklshini kenetten tejeýge ıtermeleıtin avtomobılshilerdiń kútpegen manevrleri, sondaı-aq mototsıklıstiń kólikti qaýipti júrgizýi.

Sonymen qatar, qolaısyz aýa raıy da - apatqa ákeletin faktor.



Avtor Janat Qapalbaeva
Basty sózder: Aqmola oblysy, Kólik, Jol, Oqıǵa,
Joǵary qaraı