Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqmolalyq medbıke Florens Naıtıngeıl atyndaǵy medalge ıe boldy

2021 jyldyń 19 maýsym 2021 16:31

KÓKShETAÝ. QazAqparat - Aqmola oblystyq kópsalaly aýrýhanasy anestezıologııa jáne jansaqtaý bóliminiń medbıke-anestezısti, «Vera v dobro» qoǵamdyq qaıyrymdylyq qorynyń quryltaıshysy jáne teńdesiz jaqpa maıyn oılap tapqan Tatıana Spıglazova Florens Naıtıngeıl atyndaǵy medalge ıe boldy, dep habarlaıdy QazAqparat tilshisi.

Bul Qazaqstannyń esebinde altynshy, al Aqmola oblysynda ekinshi medal alǵan medıtsına qyzmetkeri. Ekinshi dúnıejúzilik soǵys jyldarynda jáne beıbit ýaqytta kórsetken medıtsınalyq kómegi úshin 1973 jyly laıyqty marapatqa alǵashqy aqmolalyq áıel Marııa Smırnova (Kýharskaıa) ıe bolǵan edi. Endi mine, 50 jyldan keıin Florens Naıtıngeıl medali bar ǵumyryn aýyr naýqastarǵa kómektesýge arnap kele jatqan oblystyń taǵy bir turǵyny Tatıana Spıglazovaǵa buıyryp otyr. Bul jaı ǵana bos sóz emes. Dárigerlerden kúderin úzip, úıine qaıtarylǵan naýqasqa árdaıym Tatıana Spıglazova kómekke keledi. Ol naýqastyń qaıǵy-qasiretin jeńildetip qana qoımaı, oǵan úmit otyn uıalatyp, aıaqqa turǵyzý úshin qoldan kelgenniń bárin jasaıdy.

«Men bala kezimde dáriger bolýdy armandadym. Qýyrshaqtarmen oınap, kórshilerimdi tańyp tastaıtyn edim. Sol kezden men dáriger bolyp jumys isteýge bel býdym. Óskende kim bolasyn dese, birden adamdardy emdeımin dep jaýap beretinmin. Al jasóspirim bolaǵan kezde, ákem syrqattanyp qaldy. Sol kezde men barlyq aýyr naýqastar kezdesetin kóptegen túıitkildi máselelerge tap boldym. Ákemniń ómirden ótkenine 20 jyldan astam ýaqyt bolsa da, bul máseleler áli de bar», - dep bastady Tatıana.

Medbıke bolyp jumys istegenge deıin volonterlik qyzmetpen aınalysqan aq halatty abzal jan tek aýrýhananyń qabyrǵasynda ǵana emes, odan tys jerlerde de naýqastarǵa kómektesip keledi. Ákesimen bolǵan qıyndyqty eske ala otyryp, jansaqtaý bóliminde aýyr naýqastarmen jumys istegen Tatıana kóptegen naýqastardyń úılerinde traheostomııalyq tútikti, asqazan zondyn, tsıstostomany, qysym jaralaryn jáne taǵy basqalardy aýystyrý sııaqty máselelerge tap bolatynyna kóz jetkizdi.

«Bastapqyda men ne isteý kerektigin bilmedim. Shamamen 10 jyl buryn men munyń bárin kórip, ekinshi bilim alýǵa bel býdym. Kókshetaý joǵary medkolledjinde «farmatsııany» bitirip, qysymnyń jarasyn emdeý úshin óziniń jaqpa maıyn oılap tapty. Tipti ónertabysqa patent te aldy. Biraq 2016 jyly ony tirkeý úshin 8-10 mıllıon teńge qajet boldy. Árıne, mende mundaı aqsha bolǵan joq, demeýshilerdi tabý múmkin emes. Sondyqtan 2016 jyldan bastap men jaqpa maıymdy tirkeı almaı kelemin. Biraq ta, men ony úıde jasap, naýqastardyń qysym jaralaryn emdeımin», - deıdi Tatıana.

Búgingi tańda negizgi jumysynan basqa, ol kún saıyn aýyr naýqastarǵa baryp kómektesýde. Aýyr hálde jatqan naýqastarǵa Tatıana tipti tún ortasynda da shaqyrýmen barady. Aýyr naýqas adamy bar árbir otbasy úshin Tatıana úmit otyn uıalatatyn týysqanyndaı.

«Kúnnen kúnge naýqastardyń sany artýda. Bizdiń «Vera v dobro» qaıyrymdylyq qory Kókshetaý joǵary medıtsınalyq kolledjimen yntymaqtastyqta jumys isteýde. Osyndaǵy stýdentter bizge kómektesip, tájirıbe jınaqtaýda. Men olardy aýyr naýqastarǵa birden jibere almaımyn, bul kóp tájirıbe jáne úlken jaýapkershilikti qajet etedi. Tipti aýyr naýqasqa traheostomııalyq tútiktiń sanatsııasy men asqazan zondyn durys qoımaýdyń saldary aýyr bolýy múmkin. Biraq balalar tájirıbe jınaıdy, aýyr naýqastardy shomyldyrýǵa kómektesedi», - dep tolyqtyrdy Tatıana.





Pandemııanyń alǵashqy tolqynynda medbıkede shuǵyl kútimdi qajet etetin 70-ten astam naýqasqa kómektesti. Ol túnde úıge kelip, naýqastarǵa jaqpa maıyn daıyndady.

«Árıne, háli nasharlaǵan naýqastyń kúıin kózben kórý óte qıyn. Alaıda, dárigerler qaıtys bolady dep úıine jibergen naýqasty aıaqqa turǵyzý men úshin mańyzdy. Bul kóp nárseni talap etedi! Siz óz jumysyńyzdy kórgende jáne jaqpa qandaı jaralardy emdeıdi - bul da kóp nárseni talap etedi! Ol ósimdik tektes, ony Qazaqstannyń barlyq qalalarynda, tipti Reseıde de qoldanady», - deıdi Tatıana.

Búgingi tańda Tatıana Spıglazovanyń eńbek ótili 20 jyldan asady. Tatıananyń osy aralyqta qansha naýqasqa kómekteskenin sanap tizý múmkin emes.





«Naǵyz medbıke qandaı bolýy kerek? Bul úlken júregi bar adam bolýy kerek. Siz jumysqa kelgende, jeke basyńyzdyń máselesin oılamaýyńyz kerek. Siz óz kásibińizdiń fanaty bolýyńyz kerek. Qyzyl Jarty Aı qoǵamynyń Aqmola fılıaly meni marapattaqa usynǵanyn estidim. Biraq ta, maǵan Florens Naıtıngeıl medali beriletinin kútken joqpyn. Meniń jumysymdy baǵalaǵan Shveıtsarııaǵa rahmet! Medıtsına qyzmetkerleri kúni qarsańynda barsha áriptesterimdi kásibı merekelerimen quttyqtaımyn!» - dep túıindedi Tatıana Spıglazova.


Avtor Aslan Ospanov
Basty sózder: Medıtsına, Aqmola oblysy,
Joǵary qaraı