Aýa raıy
Astana -10 °S
Almaty -12 °S
valıýta baǵamy
USD 421.58
EUR 496.83
RUB 5.53
CNY 62.20

AQSh-ta «Ál-Farabı» qazaqstandyq ortalyǵy ashylady

2020 jyldyń 20 qarasha 2020 15:46

NUR-SULTAN. QazAqparat - Ǵylymı-bilim berý ortalyǵy ál-Farabı atyndaǵy Qazaq ulttyq ýnıversıteti men Amerıkanyń Órkenıetter yntymaqtastyǵy jáne almasý qory (ÓYAQ) arasyndaǵy ózara kelisim boıynsha Merılend qalasynda (AQSh) ashylady.

Bul órkenıetterdiń uly fılosofy – ál-Farabıdiń 1150-jyldyq mereıtoıy atap ótilip jatqan aıtýly jyly AQSh pen Qazaqstan arasyndaǵy yntymaqtastyqty damytýda mańyzdy oqıǵa bolmaq.

Ortalyq Qazaq ulttyq ýnıversıteti esimin abyroımen alyp júrgen adamzattyń kórnekti oıshyly Ábý Nasyr ál-Farabıdiń altyn entsıklopedııalyq murasyn ilgeriletý salasyndaǵy birlesken jobalardy iske asyrý jónindegi biregeı halyqaralyq alańǵa aınalady.

Órkenıetter yntymaqtastyǵy jáne almasý qorynyń basty mıssııasy túrli konfessııaǵa jatatyn halyqtar men mádenıetterdiń yntymaqtastyǵyn damytý.

Qor basshysy Mohamad Bashar Arafat atap ótkendeı: «Osy turǵydan alǵanda, ásirese pandemııa jáne álemdik ekonomıka men saıasattaǵy tereń ózgerister jaǵdaıynda qazirgi álemde ál-Farabıdiń rýhanı murasyna júginýdiń mańyzy asa zor.

Ál-Farabıdiń ilimi qaıyrymdy jáne kemeldi qoǵamǵa qol jetkizý jolynda birigý ári yntymaqtastyq ıdeıalaryn negizge alǵan, sondaı-aq, bul ıdeıalar búgingi kúni jańa qaýip-qaterlerge tap bolǵan álem úshin erekshe ózekti».

Jýyrda Qazaqstannyń AQSh-taǵy Elshiliginiń qoldaýymen QazUÝ Djordj Vashıngton atyndaǵy Amerıka ýnıversıtetimen birlesip uly oıshyldyń mereıtoıyna arnalǵan onlaın dóńgelek ústel ótkizdi.

Ýnıversıtet álemniń túrli elderinde ál-Farabıdiń 12 ortalyǵy men úıin ashyp, belsendi jumys júrgizýde. Osyndaı Ortalyq Amerıkada alǵash ret ashylady.

AQSh-ta «ál-Farabıdiń» alǵashqy ortalyǵyn ashý týraly ýaǵdalastyq adamzat oıshylynyń tulǵasyna degen joǵary qurmettiń jáne onyń gýmanıstik murasyna erekshe qyzyǵýshylyqtyq belgisi retinde baǵalanady.

Ál-Farabı atyndaǵy QazUÝ-dyń belsendi halyqaralyq qyzmeti jáne onyń amerıkalyq áriptesterimen tıimdi ózara árekettesýi, Merılendtegi «ál-Farabı» ortalyǵyna uly fılosoftyń murasyn elimizdiń brendi retinde zerdeleý men ilgeriletýdiń, sondaı-aq jerdiń batys jarty sharynda Qazaqstannyń tili men mádenıetin dáripteýdiń ozyq ortalyǵy bolýǵa múmkindik beredi.





Basty sózder: ál-Farabı, Mádenıet, Bilim, JOO-lar,
Joǵary qaraı