Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqtaýda alǵash ret jerasty qoqys konteıneri ornatyldy

2021 jyldyń 17 qyrkúıek 2021 07:21

AQTAÝ. QazAqparat - Túrik kompanııasy Aqtaý qalasyna jerasty qoqys konteınerin syıǵa tartty, dep habarlaıdy, QazAqparat tilshisi.

Alǵash ret ornatylǵan jerasty konteıneriniń birneshe artyqshylyqtary bar. Máselen, qalanyń estetıkalyq kelbeti jaqsaryp, jaǵalaý aımaǵyndaǵy týrızmniń damýyna oń áserin tıgizedi. Qala turǵyndary men qonaqtarynyń demalýyna da qolaıly bolmaq. Óıtkeni, konteınerlerden qolaısyz ıis shyqpaıdy jáne arnaıy tehnıkamen shyǵarý kezde qoqys jan-jaqqa tógilmeıdi.

«Aqtaý qalasyna kelgenime 2 jyldan asty. Ásem qalada eski konteınerdiń turǵanyn kórip, kompanııanyń atynan osyndaı jerasty qoqys jáshikterin syıǵa tartýdy sheshtim. Kórshi elder arasyndaǵy ynymaqtastyq nyǵaıa bersin», - dedi kompanııa dırektory Álı Delıbýdak.

Sonymen qatar, zamanaýı konteınerdiń kólemi qazirgi qoldanystaǵy qoqys jáshikterinen úlken. Bul óz kezeginde reıster sanyn azaıtyp, qoqys shyǵaratyn mekemeler úshin tıimdi bolmaq.

Qala ákiminiń orynbasary S.Gýsmannyń aıtýynsha jańa úlgidegi qoqys konteınerin ornatý jóninde qalalyq máslıhattyń kezekti sessııasyna usynys berilmek.

Joǵary qaraı