Aýa raıy
Astana 0 °S
Almaty 7 °S
valıýta baǵamy
USD 421.58
EUR 496.83
RUB 5.53
CNY 62.20

Aqtaýda salynyp jatqan 7 mlrd teńgeniń statsıonary nesimen erekshelenedi

2020 jyldyń 28 qyrkúıek 2020 01:25

AQTAÝ. QazAqparat - Aqtaý qalasyndaǵy birinshi shaǵyn aýdanda 200 adamǵa arnalǵan modýldi statsıonardyń qurylysy júrip jatyr, dep habarlaıdy QazAqparat tilshisi.

Pandemııanyń alǵashqy tolqynynda qazaq medıtsınasynyń kemshiligi kórinip, aýrýhanalarda oryn tapshylyǵy sezilgeni jasyryn emes. Búginde álemniń birqatar elinde Covid-19 ekinshi tolqyny bastalyp ketti. Qazaqstan Úkimeti bul jaǵdaı bizdi de syrt aınalmaıtynyn túsinip, indettiń ekinshi tolqynyna daıyndyq jumystaryn qolǵa aldy. Sonyń biri – 13 óńirde modýldi statsıonar salý. Zamanaýı medıtsınalyq ortalyq Mańǵystaý oblysynda da salynyp jatyr. Sebebi, oblys ortalyǵyndaǵy aýrýhanalardyń ábden tozyǵy jetken.

Alaıda 1 qazanda ashylady dep josparlanǵan nysan óńirge qajet emes degen pikirler aıtyla bastady. Oblystyq máslıhat depýtaty Abbat Órisbaev qyrýar qarjyǵa tez salynatyn aýrýhana ashý qısynǵa kelmeıdi deıdi. QazAqparat tilshisi depýtat pen oblystyq densaýlyq saqtaý basqarmasy basshysynyń pikirin tyńdap kórdi.

Mańǵystaý oblystyq máslıhatynyń depýtaty Abbat Órisbaev óńirdiń densaýlyq saqtaý basqarmasy bólingen jeti mıllıard teńgege oblystaǵy qala men aýdandardaǵy burynnan bar birneshe medıtsınalyq ortalyqty jóndeýden ótkizgen áldeqaıda arzan ári tıimdi dep esepteıdi.

«Sońǵy 10-15 jyl ishinde densaýlyq saqtaý basqarmasynyń árbir basshysy Munaıly aýdandyq aýrýhanasy, Aqtaý kópsalaly aýrýhanasy, jedel járdem aýrýhanasy, jańa máıithanany qaıta salý sııaqty bizdiń óńir úshin eń qajetti nysandardy salý jospary týraly aıtady. Ókinishke qaraı, áli kúnge deıin bul máseleler tolyq sheshimin tapty deı almaımyn. Endi óńirde mobıldi juqpaly aýrýlar aýrýhanasyn salýǵa jeti mıllıard teńge bólý týraly sheshim kópshiliktiń túsinbeýshiligin týǵyzady», - deıdi Abbat Órisbaev.

Depýttatyń saýalyna Mańǵystaý oblysy densaýlyq saqtaý basqarmasynyń basshysy Jamal Jamanbaeva jaýap berdi. Onyń aıtýynsha, óńirde ábden tozyǵy jetken medınıtsalyq nysandardy qaıta jamap-jasqaǵanmen eski ortalyqtardyń medıtsınalyq áleýetin zaman talaptaryna saı etip jasaý múmkin emes.

Sebebi, oblys ortalyǵyndaǵy ınfektsııalyq aýrýhana 1981 jyly salynǵan. Nysan negizinen 50 adamǵa shaqtalǵan. Pandemııa kezinde 70 tósek-orynǵa deıin kóbeıitilgenimen, tozyǵy jetken aýrýhananyń karantın kezinde naýqastardy emdeýge shamasy kelmegenin jasyrmady.

«Koronavırýs indetiniń qashan toqtaıtynyn eshkim dóp basyp aıta almaıdy. Epıdemıologııalyq turǵydan qaraǵanda tek bizdiń elimiz ǵana emes, dúnıejúzinde aýrýhana jetispeýshiligi baıqaldy. Vedomstvoaralyq komıssııanyń otyrysynda elimizde 13 modýldik ınfektsııalyq statsıonar salý uıǵaryldy. Shyny kerek, sol tizimge bizdiń oblys kirgenine qatty qýandyq. Depýtattyń saýalyn kórdim. Meniń aıtarym, oblysqa jańa ınfektsııalyq statsıonar qajet. Ekinshiden, shaǵyn jáne orta bıznes nysandaryn, qonaqúılerden aýrýhana jasaýǵa bolmaıdy. Eki nysannyń qyzmet etý salasy ár túrli. Al, ınfektsııalyq statsıonardyń qurylysyna kóp qarjy bólinýine sebep bar. Birinshiden, onyń ishinde aýany zalalsyzdandyratyn júıe bar. ıAǵnı, syrttan aýa kirmeıdi, sáıkesinshe, ishtegi aýany syrtqa shyǵarmaıdy. Eki naýqas jatsa, ekeýi bir-birine aýrýyn juqtyra almaıdy. Qabyrǵalary, esik-terezeleri bakterııaǵa qarsy jabyndymen qaptalady. Demek, bul - jaı ǵımarat emes», - dedi basqarma basshysy.

Jamal Jamanbaevanyń málimetinshe, modýldi statsıonar ázirge oblystyq aýrýhananyń bir bólimshesi retinde qurylyp jatyr. Bolashaqta ony ınfektsııalyq ortalyq retinde ashý josparlanǵan.

«Statsıonarǵa 300-den asa medıtsına qyzmetkeri qabyldanady. Jalpy, Mańǵystaýda epıdemıologııalyq ahýalǵa sáıkes 170 adamǵa arnalǵan 9 ınfektsııalyq statsıonar bar. Rezervtegi 11 ınfektsııalyq statsıonarda 1835 tósek-oryn daıyn», - dep túıdi basqarma basshysy.


Joǵary qaraı