Aýa raıy
Astana 28 °S
Almaty 35 °S
valıýta baǵamy
USD 412.55
EUR 468.66
RUB 5.79
CNY 58.80

Aqtóbe aýrýhanasynyń bas dárigerin áriptesteri aqtyq saparǵa shyǵaryp saldy

2020 jyldyń 12 shilde 2020 02:00

AQTÓBE. QazAqparat - Aqtóbede ınfektsııalyq aýrýhananyń bas dárigeri Qalıhan Qozbaǵarov kóz jumdy. Áriptesteri ony aqtyq saparǵa shyǵaryp saldy, dep habarlaıdy QazAqparat tilshisi.

«Ár qazaq meniń jalǵyzym» dep soqqan taǵy bir júrek toqtady. Ókinishti. Otbasyna, aǵaıyn-týysyna qaıǵyra kóńil aıtamyz! Siz bizge kásibı biliktiligińizben qatar, adaldyq, adamdyq qasıetterińizben úlgi boldyńyz, endi máńgi júregimizdesiz», - dep jazdy Hromtaý aýdandyq aýrýhanasynyń ujymy.

Qalıhan Qozbaǵarovtyń áriptesteri karantın rejımin saqtap, ony sońǵy saparǵa shyǵaryp saldy.


Bas dárigerdiń qazasyna oraı oblys ákimi Ońdasyn Orazalın de kóńil aıtty.
«Oblysymyzdyń betke ustar azamaty, aq halatty abzal jan, ınfektsııalyq aýrýhananyń bas dárigeri Qozbaǵarov Qalıhan Esbosynulynyń mezgilsiz qaıtys bolýyna baılanysty qaıǵyryp kóńil aıtamyn.
Qozbaǵarov Qalıhan Esbosynuly eńbek jolynyń kóp jyldaryn oblysymyzdyń medıtsına salasyn damytýǵa jáne aımaq turǵyndarynyń densaýlyǵyn jaqsartýǵa arnady. Antyna adaldyq tanytyp, álemdi jaılaǵan indetpen kúres júrgizý jolynda óz basyn qaterge tigip, bar kúsh-jigerin jumsap qanshama jannyń ómirin saqtap qaldy. Memleket basshysy Qasym-Jomart Toqaev keshegi Úkimet otyrysynda «Dárigerlerimizdiń densaýlyǵyn saqtaý, olardyń jumysqa qabilettiligi men yntasyn arttyrý – óte mańyzdy» degen bolatyn. Kózge kórinbeıtin maıdanda aıanbaı kúresip júrgen dárigerlerdiń eńbegi ólsheýsiz. Biz de óz tarapymyzdan oblysymyzdyń dárigerlerine jan-jaqty qoldaý kórsetý úshin birqatar sharalardy qabyldadyq», - dep jazdy oblys basshysy áleýmettik jelidegi paraqshasynda.





O.Orazalın atap ótkendeı, Qalıhan Esbosynuly kópshilikke qamqor aǵa, qoǵam men ujymdastary arasynda syıly, eli súıetin ulaǵatty jan boldy.

«Jan-jaǵyna meıirim shapaǵaty mol, júregi jylýlyqqa toly, bilikti basshy Qalıhan Esbosynulynyń izgilikti isteri men jarqyn beınesi jadymyzda máńgi saqtalady.
Artynda qalǵan áýletine, týma-týystaryna amandyq, tózimdilik pen sabyrlyq tileımin», - dedi Aqtóbe oblysynyń ákimi.

Qalıhan Qozbaǵarov bıyl 60 jasqa tolar edi.








Joǵary qaraı