Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Aqtóbe polıtsııasy nelikten jýrnalısterden túsinikteme alǵanyn túsindirdi

2022 jyldyń 14 qańtar 2022 20:50

AQTÓBE. QazAqparat – Aqtóbede bes jýrnalıst polıtsııa departamentine shaqyrylyp, olardan jaýap alyndy. Oblystyq polıtsııa departamenti baspasóz qyzmetiniń habarlaýynsha, bári kýáger retinde shaqyrylǵan, dep habarlaıdy QazAqparat tilshisi.

Aqtóbe oblysynda alańǵa baryp, jumys istegen jýrnalısterden jaýap alyndy. Bireýiniń úıin tintip, uıaly telefony tárkilendi. Oblystyq polıtsııa departamenti baspasóz qyzmetiniń habarlaýynsha, bári kýáger retinde shaqyrylǵan.

«4 qańtardan bastap oblys ákimdigi aldyndaǵy alańda birneshe kún mıtıng ótti. Qazirgi ýaqytta oblystyq polıtsııa departamenti jappaı tártipsizdiktiń belsendi qatysýshylaryn anyqtaýǵa baǵyttalǵan jedel is-shara júrgizip jatyr. Sonyń ishinde kúdiktilerdi anyqtaý jáne beıne jazbanyń bar-joǵyn tekserý, túsinikteme berý úshin keıbir jýrnalıst kýáger retinde shaqyryldy. Telefondarda saqtalatyn foto jáne beıne materıaldardy zerdeleý júrgizilýde. Tekserýden keıin baılanys quraldary ıelerine qaıtarylady.

Vedomstvoaralyq tergeý tobynyń barlyq is-áreketteri tergeý prokýrorymen kelisilgen jáne QІJK normalaryn buzýǵa jol berilmegen. Kórineý jalǵan aqparat taratýǵa jol berilmeıtini týraly eskertemiz. Tótenshe jaǵdaı kezinde mundaı derek anyqtalsa, QR QK 274-babyna sáıkes jeti jylǵa deıin bas bostandyǵynan aıyrý jazasy kózdelgen», - dedi oblystyq PD baspasóz qyzmetiniń jetekshisi Erbolat Sarqulov.

Bılik ókilderine qatysty zorlyq-zombylyq kórsetý, ǵımarattarǵa shabýyl jasaý, jappaı tártipsizdik uıymdastyrý men terrorızm aktileriniń barlyq faktisi boıynsha oblysta sotqa deıingi 14 tergeý bastaldy. Olardyń ishinde asa aýyr qylmys jasady degen kúdikpen 12 adam ýaqytsha ustaý ızolıatoryna qamaldy.

Eske sala ketsek, buǵan deıin QR Aqparat jáne qoǵamdyq damý mınıstrligi ustalǵan BAQ ókilderine qatysty árbir jaǵdaıdy muqııat tekseretinin málimdegen bolatyn.



Avtor Altynaı Saǵyndyqova
Basty sózder: Aqtóbe oblysy, QR ІІM, BAQ,
Joǵary qaraı