Aýa raıy
Astana -6 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Aqtóbede Abaıdyń eńseli eskertkishi boı kóterdi

2020 jyldyń 27 qazan 2020 20:45

AQTÓBE. QazAqparat – Aqtóbe qalasynda aqyn Abaıǵa eskertkish ornatyldy, dep habarlaıdy QazAqparat tilshisi.

Aqtóbe qalasynda «Ádebıet. Rýh. Qoǵam» respýblıkalyq forýmy ótti. Oǵan Qazaqstan Jazýshylar Odaǵynyń tóraǵasy Ulyqbek Esdáýlet, aqyn Aqushtap Baqtygereeva, ShQO Abaı aýdanynyń ákimi Jarqynbek Baısabyrov qatysty.

Ádebı keshten soń uly oıshyl, qazaqtyń bas aqyny Abaı Qunanbaıulynyń eskertkishi ashyldy.

«Abaıdyń óleńderi men qara sózderinde ult bolmysy, bitimi, turmysy, tirshiligi, dúnıetanymy, rýhy kórinis taýyp keledi. Bıylǵy mereıtoı elge oı salatyn, taǵylymy mol naqty sharalarmen jalǵasýda. Álemge tanymal bas aqynymyzdyń eńbegin halyq bolyp ulyqtaý memleketimizdiń mereıin arttyrady. Uly oıshyldyń asyl murasyn ardaqtaý jáne jan-jaqty dáripteý – barshamyzdyń mindetimiz. Ol úshin búgingi býyn Abaı murasynan nár alyp, rýhanı kemeldenýi qajet. Bul úrdis Abaı jylynan keıin de jalǵasyn tabatyn bolady» - dedi oblys ákimi Ońdasyn Orazalın.





Eskertkishtiń ashylý saltanatynda Qazaqstan Jazýshylar Odaǵynyń tóraǵasy U.Esdáýlet, aqyn A.Baqtygereeva quttyqtaý sóz sóılep, QR Mádenıet jáne sport mınıstriniń keńesshisi E.Jurynbaev mınıstrdiń arnaıy quttyqtaý sózin jetkizdi. ShQO Abaı aýdanynyń ákimi J.Baısabyrov uly aqynǵa qurmet kórsetip jatqan aqtóbelik aǵaıynǵa óz alǵysyn bildirdi.

«Uly Abaı bizdiń ultymyzdyń uly ustazy, adastyrmas aqylshysy, aspanda jarqyraǵan temirqazyq juldyzy. Onyń shyǵarmalary bizdiń ulttyq ıdeologııamyzdyń quramdas bóligine aınaldy. Bıyl Qazaqstan jáne túrki halyqtary úshin Abaı jyly boldy. Sonymen birge Jazýshylar Odaǵynyń usynysymen Abaı kúni bekitildi. Abaı jyldary qıyn-qystaý kezde halyqty aman alyp shyqty. Táýelsizdik tusynda da óz baǵyt-baǵdaryn Abaıǵa qarap aıqyndady», - dedi U.Esdáýlet.





Atap óteıik, eskertkish Aqtóbe qalasyndaǵy Abaı dańǵyly men Eset batyr kóshesiniń qıylysynda ornalasqan. Eskertkishtiń avtorlary - Qazaqstan Respýblıkasynyń Mádenıet qaıratkeri, belgili músinshi, Qazaqstan sýretshiler Odaǵynyń múshesi Toqtar Ermekov jáne qalamyzdaǵy Áıteke bı, Jalańtós Bahadúr, Bókenbaı batyr, Álııa syndy tarıhı eskertkishteriniń avtory Jeńis Jubanqosov.

Eskertkish Ekaterınbýrg qalasynda jasalynǵan. Eskertkishtiń jalpy bıiktigi - 6,20 metr. Buǵan deıin Aqtóbede Abaı eskertkishi bolmaǵan.

«Eskertkishi keshigip bolsa da ashyldy. Bir jaǵynan qýanamyz, ókinish te bar. Danyshpany, oıshyly joq ulttyń rýhy tómen bolady. Egemendikke raqmet. Ata-baba armandaǵan ýaqyt keldi. Sol egemendiktiń arqasynda búgin biz babamyzǵa eskertkish qoıyp, óz ana tilimizde bir-birimizdi quttyqtap jatyrmyz. Búgin biz Abaıǵa emes, ózimizge emes, bir bolashaqqa jumys istedik. Nemere men shóbere osy jerden ótkende «danyshpany bar ulttyń balasymen» dep óssin», - dedi A.Baqtygereeva.










Joǵary qaraı