Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqtóbede aýdan ákiminiń orynbasary balasyna jer telimin bólip bergeni úshin jazalandy

2021 jyldyń 20 sáýir 2021 00:53

AQTÓBE. QazAqparat – Ádep jónindegi keńeste jer komıssııasynyń jumysy men qurylys máselesi qozǵaldy. Aýdan ákiminiń orynbasary balasyna jer telimin bólip bergeni úshin jazalandy, dep habarlaıdy QazAqparat tilshisi.

Ádep jónindegi keńeste Baıǵanın aýdany ákiminiń orynbasary, aýdandyq jer qatynastary bóliminiń basshysy, aýdan ákimi apparatynyń bas mamany-zańgerge, Qaraýylkeldi, Ay, Kóltaban, Qyzylbulaq, Mııaly, Jańajol, Jarqamys aýyldyq okrýgteriniń ákimderine qatysty tártiptik is qaraldy.
«Aýdan ákiminiń orynbasary B.Boranbaı jer telimin bólý kezinde balasynyń atyndaǵy «Abdýlla» sharýa qojalyǵyna basymdyq berdi. Ol 15 bas maly bar sharýashylyqtyń jaıylymy úshin 2400 ga jer berýge sheshim qabyldaǵan. Sóıtip ol komıssııa tóraǵasy bola tura múddeler qaqtyǵysyna jol berdi. Sonymen qatar «Raısa», «Tóre» jáne «Nur» ShQ-nyń jeke qarjysy ınvestıtsııa emes degen oımen ótinimder komıssııa músheleriniń ashyq daýysyna salynbaǵan. Jer komıssııasy músheleri jazbasha pikir bildirý quqyǵyn paıdalanbaǵan», - dep habarlady QR Memlekettik qyzmet isteri agenttiginiń Aqtóbe oblysy boıynsha departamentiniń baspasóz qyzmeti.
Bul sheshimdi keıbir aýyl ákimi, komıssııa múshesi múlde bilmeıtin bolyp shyqty.
«Qarjyny ınvestıtsııaǵa jatpaıdy degen áńgime múlde aıtylmady. Komıssııa hatshysy men tóraǵanyń aıtýynsha, atalǵan sharýa qojalyǵynyń qujattary tolyq bolmaǵan. Sóıtip keri qaıtaryldy. Óz basym daýys berýdi usyndym», - dedi Jańajol aýyldyq okrýginiń ákimi. Ádep jónindegi keńestiń sheshimimen Baıǵanın aýdany ákiminiń orynbasary B.Boranbaı, Baıǵanın aýdany ákimi apparatynyń bas mamany-zańger N.Kalmenova, Qaraýylkeldi aýyldyq okrýginiń ákimi J.Abıtov, Ay aýyldyq okrýginiń ákimi S.Qulbatyr, Kóltaban aýyldyq okrýginiń ákimi S.Bitimbaı, Qyzylbulaq aýyldyq okrýginiń ákimi J.Taldykov, Mııaly aýyldyq okrýginiń ákimi I.Mánibaev, Jańajol aýyldyq okrýginiń ákimi K.Konkaev, Jarqamys aýyldyq okrýginiń ákimi A.Jubanalınge eskertý túrindegi tártiptik jaza qoldaný usynyldy. Al Baıǵanın aýdandyq jer qatynastary bóliminiń basshysy D.Aýelbaevtiń isi bir jyl ishinde ekinshi ret Ádep keńesinde qaralyp, oǵan memlekettik laýazymynan bosatý túrindegi tártiptik jaza qoldaný týraly sheshim qabyldandy.
Otyrysta Shalqar aýdandyq sáýlet, qurylys, turǵyn-úı kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Q.Knıazbaevtiń eki qabatty jaldamaly turǵyn úıdi salý jáne abattandyrý kezindegi jumysy qaraldy. Ol jumys tolyq atqarylmasa da merdigerge aqshany aýdaryp jibergen. Q.Knıazbaev bir jylda ekinshi ret Ádep keńesine baryp, oǵar laýazymynan bosatý túrindegi tártiptik jaza qoldanyldy. Qobda aýdandyq sáýlet, qurylys, turǵyn-úı kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy M.Baıǵabylov dál osyndaı qatelik jiberip, eskertý aldy.

Avtor Altynaı Saǵyndyqova
Basty sózder: Ákimdik, Aqtóbe oblysy,
Joǵary qaraı